सोलापूर प्रतिनिधी :
दि. 19 जुलै 2022
राष्ट्रवादी काँग्रेसमध्ये घुसमटत असलेले मोहोळचे माजी आमदार राजन पाटील यांचा भारतीय जनता पक्षात प्रवेश अखेर ठरल्याचे वृत्त आहे. येत्या दोन ऑगस्ट रोजी राजन पाटील आपल्या संपूर्ण गटासह भाजपमध्ये प्रवेश करणार आहेत असे सूत्रांकडून समजते. विशेष म्हणजे विक्रांत ऊर्फ बाळराजे पाटील यांना विधान परिषदेवर घेण्याचा शब्द भाजपकडून देण्यात आल्याची माहिती समोर येते आहे.
गेल्या काही दिवसांपासून माजी आमदार राजन पाटील हे राष्ट्रवादीत नाराज असल्याची चर्चा जोरात आहे. विशेषतः अजिंक्यराणा आणि बाळराजे पाटील यांच्या मनात पक्षाबाबत साशंकता निर्माण झाल्याची चिन्हे आहेत. विरोधात बोलणाऱ्या पक्षातील लोकांना वरिष्ठ नेत्यांकडूनच बळ दिले जात असल्याने पाटील गटात नाराजी वाढत चालली आहे. विशेषतः राष्ट्रवादी काँग्रेसचे जिल्हा कार्याध्यक्ष उमेश पाटील यांनी जनता दरबाराच्या माध्यमातून राजन पाटील व त्यांच्या सुपुत्रांच्या कार्यशैलीचे वाभाडे काढण्याचा एकमेव कार्यक्रम हाती घेतलेला दिसतो आहे. त्यामुळे उमेश पाटलांचा जनता दरबार राजन पाटलांना जाचक ठरू लागला आहे. उमेश पाटील यांच्याकडून होणाऱ्या हल्ल्यांबाबत पक्षनेतृत्वाला सांगूनही ते सुरू राहिल्याने पाटील कुटुंबीय राष्ट्रवादीच्या नेतृत्वावर कमालीचे दुखावले आहेत. जिल्हा परिषदेचे माजी सदस्य विक्रांत ऊर्फ बाळराजे पाटील यांनी साधारण गेल्या पंधरा दिवसांपूर्वी समाज माध्यमांवर पोस्ट करून भाजप प्रवेशाचे संकेत दिले असल्याची चर्चा तालुकाभर आहे.
दरम्यान, राजन पाटील आणि कुटुंबीयांचा भाजप प्रवेश आता निश्चित झाल्याची माहिती सूत्रांकडून मिळाली आहे. विशेष म्हणजे बाळराजे पाटील यांना विधान परिषदेवर घेण्याचा शब्दही भाजपकडून दिल्याचे समजते आहे. त्यामुळे राष्ट्रवादी कॉंग्रेस पक्षाला तीन वेळा पंचवार्षिक आमदार देणारे पाटील कुटुंबीय हे येत्या दोन ऑगस्ट रोजी भाजपमध्ये प्रवेश करणार असल्याचे नक्की झाले आहे.
राजन पाटलांच्या हालचालींवर फडणवीसांची नजर?
दरम्यान, मोहोळमधील राजन पाटील यांच्याबाबतच्या घडामोडींकडे उपमुख्यमंत्री देवेंद्र फडणवीस यांचे बारीक लक्ष आहे. तालुक्यातील सर्व घटनांची माहिती भाजपचे नेते संजय क्षीरसागर यांच्याकडून घेतली जात आहे. त्याचवेळी क्षीरसागर यांना फडणविसांनी यासंदर्भात आज मुंबईला पाचारण केल्याचे सूत्रांचे म्हणणे आहे.. त्यामुळे येत्या काळात मोहोळमध्ये राष्ट्रवादीला धक्का बसल्यास ते आजिबात अनपेक्षित नसेल.
दरम्यान, भाजप प्रवेशाची अफवा असून आम्ही राष्ट्रवादी काँग्रेसचे सर्वेसर्वा शरद पवार यांच्यासोबत कायम राहू, असे मोहोळचे राष्ट्रवादी काँग्रेसचे माजी आमदार राजन पाटील यांनी वृत्तवाहिन्यांशी बोलताना सांगितले. सत्तेचं काय? ती जात येत असते पण आम्ही सत्तेसाठी हपापलेलो नाही. आम्ही एका विचाराने प्रेरित झालेलो आहोत. त्यामुळे जिकडे सत्ता तिकडे आम्ही असे आजिबात नाही. आम्ही भाजपमध्ये प्रवेश करणार असल्याची केवळ अफवा आहे. तशी वेळ आल्यास आम्ही सर्वप्रथम मतदारांना सांगू. सध्या माध्यमांमधून भाजप प्रवेशाच्या बाबतीत केवळ अफवा पसरवल्या जात आहेत, असेही ते पुढे म्हणाले.
