शिरुर प्रतिनिधी/ डीडी न्युज मराठी
दि.22 ऑक्टोबर 2023
देशातील महत्वाची एमआयडीसी म्हणून ओळख असलेल्या रांजणगाव गणपती ग्रामपंचायतीची निवडणुक येत्या ५ नोव्हेंबर रोजी संपन्न होत आहे. या निवडणुकीसाठी इच्छुकांची संख्या मोठी आहे. दोन पेक्षा जास्त पॅनल निवडणुकीला सामोरे जाऊ शकतात. मात्र, या सगळ्यात निवडणुकीच्या पिक्चरमध्ये मानसिंग पाचुंदकर हे मुख्य भूमिकेत असलेले दिसून येत आहे. त्यांच्या पॅनलसोबत जो पॅनल किंवा जे उमेदवार येतील तेच या अंगावर गुलाल घेतील अशी परिस्थिती आहे.
रांजणगाव गणपतीची निवडणुक ही नेहमीच प्रतिष्ठेची निवडणुक असते. सरपंच पदासाठी यंदाही थेट जनतेतून निवडणूक होत आहे. या निवडणुकीसाठी मागावसवर्गीय महिला आरक्षण पडल्यामुळे अनेकांचा सरपंच होण्याचा हिरमोड झाला आहे. तरिही या निवडणुकीतील रंगत कमी झाली नसल्याचे दिसत आहे. प्रत्येकाला त्यांच्या राजकीय भविष्यासाठी या ग्रामपंचायतीत कशी का असेना सत्ता हवी आहे. म्हणूनच संपुर्ण जिल्ह्याचे या ग्रामपंचायतीच्या निवडणुकीकडे लक्ष लागून राहिले आहे. आजपर्यंत पाचुंदकर आणि खेडकर या दोन पॅनल मध्ये प्रामुख्याने लढत झालेल्या आहेत. मात्र, आज रांजणगावमध्ये जवळपास ४ पॅनल होण्याची शक्यता आहे. यामध्ये मानसिंग पाचदुंकर, सर्जेराव खेडकर, श्रीकांत पाचुंदकर, राहुल पवार व शेखर पाचुंदकर आणि स्वाती पाचुंदकर असे पॅनल दिसून येत आहेत. शेवटच्या क्षणी त्यापैकी कोणतेही दोन पॅनल रिंगणात राहु शकतात. त्यासाठी एक एक पॅनल कोणत्या ना कोणत्या पॅनलमध्ये जाँईन होण्याची शक्यता आहे. अगदी कट्टर विरोधक ही पक्के दोस्त होऊ शकतात, अशी परिस्थिती आहे.
मात्र, या निवडणुकीच्या रणसंग्रामात मानसिंग पाचुंदकर हे मुख्य भूमिकेत आहेत. त्यांनीही स्वतंत्र्य पॅनलच्या माध्यमातून निवडणुकीला सामोरे जाण्यासाठी तयारी केली आहे. चार पॅनलपैकी मानसिंग पाचुंदकर यांच्या पॅनलकडे उमेदवारीसाठी सर्वात जास्त इच्छुकांचा ओढा आहे. आगामी काळात होणा-या जिल्हा परिषद व स्थानिक स्वराज्य संस्थाच्या निवडणुका लक्षात घेऊन मानसिंग पाचुंदकर हे कोणतीही रिस्क न घेता मोठ्या ताकदीने मैदानात उतरले आहेत. प्रत्येक वॅार्डातील मातब्बर असे आघाडीचे शिलेदार त्यांनी सोबतीला घेतले आहेत. तसेच त्यांनी सरपंच म्हणून दहा वर्षापुर्वी केलेलं उल्लेखनीय काम गावकरी आजही विसरले नसल्याचे दिसून येत आहे. त्यामुळे मानसिंग पाचुंदकर हेच या निवडणुकीचे किंगमेकर असतील यात तिळमात्र शंका नाही.