महाराष्ट्रातील बांधकाम व घरेलू कामगारांना राज्य शासनाचा दिलासा

मुंबई प्रतिनिधीः डीडी न्युज मराठी.

दि.०४ मे २०२१

महाराष्ट्रातील बांधकाम व घरेलू कामगारांना आर्थिक सहाय्य देण्याचा निर्णय मा. मुख्यमंत्री उद्धव ठाकरे यांनी घेतला होता. या निर्णयाची यशस्वी अंमलबजावणी करण्यासाठी कामगार मंत्री ना. हसन मुश्रीफ सरसावले आहेत.

महाराष्ट्र इमारत व इतर बांधकाम कामगार कल्याणकारी मंडळामार्फत नोंदीत सक्रीय १३ लाख बांधकाम कामगारांना १५०० रुपयांचे अर्थसहाय्य करण्यात आले. यासाठी १६६ कोटी ६३ लाख ९३ हजार ५०० रुपयांचा निधी देण्यात आला आहे. कामगारांच्या बँक खात्यामध्ये ही रक्कम थेट हस्तांतरण पद्धतीने (डीबीटी) जमा करण्याचे काम सुरू आहे. त्यानुसार आजपर्यंत ११ लाख १० हजार ९२९ नोंदीत बांधकाम कामगारांना अर्थसहाय्य करण्यात आले आहे. गेल्या वर्षीही वाढत्या कोरोना संक्रमणाच्या काळात नोंदित बांधकाम कामगारांना प्रत्येकी ५ हजार रुपयांची मदत करण्यात आली होती.

तसेच महाराष्ट्र घरेलू कामगार कल्याण मंडळाकडे नोंदणी व नूतनीकरण झालेल्या घरेलू कामगारांसाठी पहिल्या टप्प्यात सक्रिय व जीवित नोंदणी असलेल्या एकूण १ लाख ५ हजार ५०० घरेलू कामगारांना प्रत्येकी दीड हजार रुपयांप्रमाणे एकूण १५ कोटी ८२ लाख ५० हजार रुपये इतका निधी वितरीत करण्यास शासनाने मान्यता दिली आहे. या निर्णयानुसार महाराष्ट्र घरेलू कामगार कल्याण मंडळाकडे नोंदणी व नूतनीकरण झालेल्या १ लाख ५ हजार ५०० घरेलू कामगारांच्या बँक खात्यामध्ये थेट हस्तांतरण (डीबीटी) द्वारे प्रत्येकी दीड हजार रुपये वितरित करण्याची कार्यवाही विकास आयुक्त (असंघटित कामगार) यांच्या स्तरावरून लवकरच करण्यात येत आहे. घरेलू कामगारांच्या थेट खात्यात शासनातर्फे मिळणारा हा निधी जमा होणार असल्याने घरेलू कामगारांना मोठा दिलासा मिळणार आहे.

CMOMaharashtra Hasan Mushrif
#MVAfightsagainstCovid #MVAfightsCorona