मुंबई प्रतिनिधी :
दि. १२ एप्रिल २०२४
भाजपकडून, भिवंडी लोकसभा मतदारसंघात, केंद्रीय मंत्री कपिल पाटील यांना उमेदवारी जाहीर करण्यात आल्यानंतर शिवसेना शिंदे गटाच्या कार्यकर्ते, पदाधिकाऱ्यांत तीव्र नाराजी पसरली होती. हा मतदारसंघ शिवसेनेला मिळावा अशी त्यांची मागणी होती.
या पार्श्वभूमीवर आज भिवंडी लोकसभेतील शिवसेनेच्या पदाधिकाऱ्यांची, डोंबिवलीत, राज्याचे सार्वजनिक बांधकाम मंत्री रवींद्र चव्हाण आणि कल्याण लोकसभेचे खासदार श्रीकांत शिंदे यांनी बैठक घेतली. या बैठकीत मागील काही दिवसात झालेले गैरसमज दूर केले गेले. यानंतर महायुतीच्या उमेदवाराला येत्या लोकसभा निवडणुकीत निवडून आणण्यासाठी काम करण्याचा निर्धार शिवसेनेच्या पदाधिकाऱ्यांनी केला.
भविष्यात दोन्ही पक्षांच्या पदाधिकारी किंवा कार्यकर्त्यांमध्ये कुठल्याही प्रकारचे गैरसमज झाल्यास थेट आमच्याशी संपर्क साधा, अशा सूचना यावेळी मंत्री रवींद्र चव्हाण आणि खासदार डॉ. श्रीकांत शिंदे यांनी पदाधिकाऱ्यांना दिल्या. तसेच ही निवडणूक एका व्यक्तीची नसून संपूर्ण देशाची आहे आणि पुन्हा एकदा पंतप्रधान नरेंद्र मोदी यांना त्या पदी विराजमान करण्यासाठी महायुतीला मतदान होणे गरजेचे आहे. त्यामुळे समज गैरसमज बाजूला ठेवून दोन्ही पक्षांच्या कार्यकर्त्यांनी पूर्ण ताकदीने महायुतीच्या उमेदवारांना निवडून आणण्यासाठी काम करावे, असे आवाहन यावेळी मंत्री रवींद्र चव्हाण आणि खासदार डॉ. श्रीकांत शिंदे यांनी केले.
