पुणे प्रतिनिधी :
दि. १७ एप्रिल २०२४
पुण्यात आता लोकसभेची निवडणूक चौरंगी होणार असल्याचं स्पष्ट झालं आहे. महाविकास आघाडी, महायुती आणि वंचित बहुजन आघाडी यांच्याबरोबर आता एमआयएम देखील पुण्याच्या मैदानात उतरली आहे. गेली पंचवीस वर्षे पुण्यातील राजकारणात सक्रिय असलेले अनिस सुंडके यांना ‘एमआयएम’ पक्षाने लोकसभा निवडणुकीच्या रिंगणात उतरवलं आहे. यामुळे महाविकास आघाडीचे उमेदवार रवींद्र धंगेकर यांची एक प्रकारे डोकेदुखी वाढणार असल्याची चर्चा सुरू झाली आहे. मुस्लिम मतांचं विभाजन सुंडके यांच्यामुळे होऊन भाजपाला फायदा होण्याची शक्यता आहे.
‘एमआयएम’चे अध्यक्ष, खासदार असदुद्दीन ओवैसी हे खासदार इम्तियाज जलील यांच्या प्रचारासाठी संभाजीनगर येथे आले असता तेथे झालेल्या जाहीर सभेत पुणे लोकसभा मतदारसंघातून अनिस सुंडके यांना अधिकृत उमेदवारी त्यांनी जाहीर केली.
खासदार ओवैसी म्हणाले, “आम्ही पुण्याच्या निवडणुकीमध्ये पूर्ण ताकदीनिशी उतरणार आहोत. निवडणूक लढविण्याची आमची सर्वांची मनापासून इच्छा आहे. पुणे लोकसभा निवडणुकीत ‘एआयएमआयएम’चे उमेदवार अनिस सुंडके भरघोस मताने निवडून येतील अशी मला खात्री आहे.”
जय भीम-जय मीमचा नारा देत, पुणे लोकसभा मतदारसंघात, सर्व जाती धर्मांना सोबत घेऊन पूर्ण ताकदीने निवडणूक लढविण्याचा निर्धार अनिस सुंडके यांनी केला आहे. अनिस सुंडकेंनी म्हटलं, “मी पुण्यातील राजकारणात गेल्या पंचवीस वर्षांपासून सक्रिय आहे. सर्व जाती-धर्मांशी माझे चांगले संबंध असून पुण्यातील अनेक प्रश्न मी मार्गी लावले आहेत. काँग्रेस पक्ष व नंतर राष्ट्रवादी काँग्रेस पक्षाबरोबर गेल्या अनेक निवडणुकांमध्ये मी काम केलेले आहे. मी अनेक पदे पुणे महानगरपालिकेत भूषविलेली असून पश्चिम महाराष्ट्रात सर्व धर्मीय लोकांशी माझा चांगला संपर्क आहे. पुण्यासाठी अनेक विधायक कामे पुणे महानगरपालिकेत स्थायी समिती अध्यक्ष असताना मी केली आहेत.”
“विविध प्रश्नांची मला जाणीव असून समाजाच्या समस्यांचा मला अनुभव आहे. अनेक आजी-माजी नगरसेवक माझ्या संपर्कात आहेत. पुण्यातील अनेक दिग्गज आजी-माजी नगरसेवकांचा ‘एआयएमआयएम’ पक्षात जाहीर प्रवेश होईल,” असा विश्वास अनिस सुंडकेंनी व्यक्त केला.
अनिस सुंडके हे माजी नगरसेवक तसेच माजी स्थायी समिती अध्यक्ष आहेत. त्यांचे लहान बंधू रईस सुंडके माजी नगरसेवक होते तर हमिदा सुंडके या त्यांच्या पत्नी पुणे मनपा 2017 च्या निवडणुकीत राष्ट्रवादी काँग्रेस पक्षाकडून निवडून आल्या होत्या.
