मुंबई प्रतिनिधी :
दि. ११ मे २०२४
पंतप्रधान नरेंद्र मोदी यांच्या एका सभेतील वक्तव्यामुळे राजकीय चर्चांना उधाण आलं होतं. नुकतंच मोदी शरद पवारांना उद्देशून म्हणाले होते, “कॉंग्रेस बरोबर जाण्यापेक्षा NDA बरोबर या, तुमच्या सार्‍या इच्छा पूर्ण होतील!” उपमुख्यमंत्री देवेंद्र फडणवीस यांनी याबाबतचं स्पष्टीकरण दिलं आहे.
पुणे श्रमिक पत्रकार संघात आयोजित पत्रकार परिषदेत बोलताना त्यांनी हा खुलासा केला. फडणवीस म्हणाले की, आजपर्यंतचं शरद पवार यांचं राजकारण बघता जेव्हा त्यांचा पक्ष कमजोर होतो तेव्हा ते कॉंग्रेसशी हातमिळवणी करतात आणि कालांतराने पुन्हा कॉंग्रेसमधून बाहेर पडतात. त्यामुळे पवार साहेबांच्या अश्या वक्तव्याचा अर्थ ज्यांना समाजायचा त्यांना समजतो. नेमका हाच संदर्भ मोदींचा होता. कुठलीही ऑफर त्यांनी दिलेली नव्हती.
या सगळ्याची पार्श्वभूमी अशी की, शरद पवार इंडियन एक्स्प्रेसला दिलेल्या मुलाखतीत म्हणाले होते, “पुढील दोन वर्षांत अनेक प्रादेशिक पक्ष कॉंग्रेसमध्ये विलीन होतील.” त्यांच्या या विधानानंतरच मोदींनी त्यांना NDAमध्ये सामील होण्याची ऑफर दिली होती.
