वाराणसी प्रतिनिधी :
दि. १५ मे २०२४
पंतप्रधान नरेंद्र मोदी यांनी गेल्या काही दिवसांपासून केलेली मुस्लिमविरोधी वक्तव्ये पाहता त्यांना या निवडणुकीत मुस्लिम मते मिळणार नाहीत, असं वातावरण होतं. परंतु, आता त्यांनी यावर भाष्य केलं आहे. मुस्लिम कुटुंबात मी राहिलो असून त्यांच्याबरोबर जेवलोसुद्धा आहे, असं नरेंद्र मोदी म्हणाले. न्यूज १८ ला दिलेल्या मुलाखतीत ते बोलत होते. वाराणसी लोकसभा मतदारसंघातील गंगा नदीच्या काठावर ही मुलाखत झाली.
माझं शासन मॉडेल धर्म किंवा जातीच्या आधारावर आधारलेलं नाही, असं मोदींनी स्पष्ट केलं. ते पुढे म्हणाले की, “मी मुस्लिम कुटुंबात लहानपणी राहिलो आहे. मुस्लिम मित्र माझे अनेक आहेत. पण २००२ नंतर माझी प्रतिमा डागाळण्याचे प्रयत्न करण्यात आले”, असे पंतप्रधान मोदी यांनी म्हणाले.
“मुस्लिम कुटुंबे आमच्या शेजारी राहत होती. माझ्या घरी ईदच्या दिवशी आम्ही जेवण बनवत नसू कारण शेजारच्या मुस्लिम घरातून जेवण यायचे. मोहरमच्या दिवशी आम्हाला ताजियाच्या खाली जायलादेखील शिकवले गेले”, असंही ते म्हणाले. पंतप्रधान म्हणाले की, २००२ नंतर त्यांची प्रतिमा डागाळल्यानंतर त्यांनी जमिनीवरील वास्तव जाणून घेण्यासाठी सर्वेक्षण केले. “मानेक चौक नावाची जागा अहमदाबादमध्ये आहे जिथे लोक संध्याकाळी जेवायला जातात. पण दिवसा सर्व व्यापारी मुस्लिम आणि सर्व खरेदीदार हिंदू आहेत. मी त्या मार्केटमध्ये काही लोकांना सर्वेक्षण करण्यासाठी पाठवले. माझ्याविरोधात त्यांच्यापैकी एकजण बोलला तेव्हा दुकानदाराने त्याला थांबवले आणि म्हणाले, “मोदींविरुद्ध एक शब्दही बोलू नका. मोदींमुळे माझी मुलं शाळेत जात आहेत. जवळपास ९० टक्के दुकानमालकांचे म्हणणे असेच होते”, असं पंतप्रधान मोदी म्हणाले.
पंतप्रधान म्हणाले की त्यांच्या आयुष्यात अशा बऱ्याच गोष्टी घडल्या असल्या तरी ते या सर्वांची जाहिरात करत नाहीत. “माझा मंत्र ‘सबका साथ सबका विकास’ हा आहे. व्होट बँकेसाठी मी काम करत नाही. काही चुकीचे असल्यास मी ते चुकीचे आहे असे म्हणेन”, पंतप्रधान म्हणाले. “देशातील लोक मला मतदान करतील हा मला विश्वास आहे की . मी ज्या दिवशी हिंदू-मुस्लिम करायला लागेन, त्या दिवसापासून मी सार्वजनिक जीवनात राहण्यास योग्य राहणार नाही. हिंदू-मुस्लिम फूट मी पाडणार नाही, ही माझी बांधिलकी आहे”, असंही ते म्हणाले.
