घाटकोपर प्रतिनिधी :
दि. १५ मे २०२४
घाटकोपरमधील दुर्घटनेतील आरोपी भावेश भिंडे बेपत्ता आहे. पोलिसांकडून त्याचा कसून शोध घेतला जातो आहे. यातच आता, भावेश भिंडेच्या शेवटच्या लोकेशनबाबत माहिती पुढे आली आहे. मुंबई पोलिसांकडून त्याचे शेवटचे लोकेशन लोणावळ्यात असल्याचे सांगण्यात आलं आहे.
पोलिसांकडून भावेश भिंडेचा शोध घेतला जातो आहे असे वृत्त ‘द इंडियन एक्सप्रेस’ ने दिले आहे. घाटकोपरमधील होर्डिंग कोसळण्याच्या दुर्घटनेनंतर पोलिसांनी त्याच्या मुलूंड येथील घरी जाऊन त्याला पकडण्याचा प्रयत्न केला. मात्र, त्यावेळी तो घरी आढळून आला नाही. यानंतर पोलिसांनी त्याचे शेवटचे लोकेशन शोधले. त्यांना त्याचे शेवटचे लोकेशन लोणावळ्यात असल्याचे आढळून आले. या महितीनंतर पोलिसांचे एक पथक भावेश भिंडेचा शोध घेण्यासाठी लोणावळ्यातही दाखल झाले. मात्र, तो सापडला नाही.
यासंदर्भात बोलताना पोलिसांनी सांगितले, की भावेश भिंडेचे शेवटचे लोकेशन आम्हाला लोणावळ्यात आढळून आल्यापासुन त्याचा फोन बंद आहे. सात पथके त्याला पकडण्यासाठी तयार करण्यात आली आहेत. त्याचा शोध सुरू असून लवकरच त्याला अटक केली जाईल.
घाटकोपरच्या पूर्व द्रुतगती मार्गावर लावलेले होर्डिंग मुंबईत १३ मे रोजी अचानक आलेल्या वादळी वाऱ्यामुळे कोसळले होते. या दुर्घटनेत १४ जणांचा मृत्यू झाला होता. ‘इगो मीडिया प्रायव्हेट लिमिटेड’ या कंपनीने हे होर्डिंग लावले होते. या कंपनीचा संचालक भावेश भिंडे हा आहे. त्याच्याविरोधात त्यामुळे सदोष मनुष्यवधाचा गुन्हा दाखल करण्यात आला आहे. आतापर्यंत १४ जणांचा मृत्यू या दुर्घटनेत झाला असून ७४ जण जखमी झाले आहेत. त्यामुळे एकूण पीडितांची संख्या ८८ झाली आहे.
दरम्यान, बृहन्मुंबई महानगरपालिकेने (बीएमसी) या दुर्घटनेनंतर एक निवेदन जारी करून हे जाहिरात फलक त्यांच्या परवानगीशिवाय बांधण्यात आल्याचे स्पष्ट केले आहे. BMC ने जारी केलेल्या निवेदनानुसार, पंत नगर येथील ईस्टर्न एक्स्प्रेस हायवेवरील पेट्रोल पंपावर असलेले हे होर्डिंग हे अनधिकृत असून महापालिकेने यासाठी परवानगी दिलेली नव्हती. सुमारे १७,०४० स्क्वेअर फूट मोठे असलेल्या या होर्डिंगची लिम्का बुक ऑफ रेकॉर्डमध्ये सर्वात मोठे होर्डिंग म्हणूनही नोंद केली गेली होती.
