मुंबई प्रतिनिधी:
दि. २४ सप्टेंबर २०२४
लवकरच प्रेक्षकांच्या भेटीला ‘येक नंबर’ हा सिनेमा येतो आहे. या सिनेमाचा टीझर काही दिवसांपूर्वीच रिलीज झाला असून या टीझरला असंख्य प्रेक्षकांची पसंती मिळते आहे. राज ठाकरे यांच्या आयुष्यावर हा सिनेमा बेतला असल्याचं म्हटलं जात आहे.
‘येक नंबर’ या चित्रपटाची चर्चा गेल्या काही महिन्यांपासून सुरू आहे. लवकरच मुंबईत, मनसे अध्यक्ष राज ठाकरे यांच्या जीवनाची प्रेरणा घेऊन बनवण्यात आलेल्या या चित्रपटाचा ट्रेलर सोहळा पार पडणार आहे. बॉलिवूडमधील दिग्गज या सोहळ्याला हजेरी लावणार असल्याचं म्हटलं जात आहे. आता तर खुद्द राज ठाकरे यांनी या सोहळ्याचं आमंत्रण बॉलिवूडचा भाईजान सलमान खान याला दिल्याचं म्हटलं जात आहे.
नुकतीच सलमान खानची राज ठाकरे यांनी त्याच्या घरी गॅलेक्सी अपार्टमेंट इथं भेट घेतली. त्यांनी सलमानला येक नंबर चित्रपटाच्या ट्रेलर सोहळ्याचं आमंत्रण या भेटीत दिल्याचं म्हटलं जातंय. दोन महिन्यांपूर्वीही सलमान खानच्या घराबाहेर गोळीबार झाल्यानंतरही त्याच्या घरी जाऊन राज ठाकरे यांनी त्याची भेट घेतली होती.
मध्यंतरीच्या काळात, या चित्रपटाचा टीझर काही दिवसांपूर्वी समोर आला होता.सुरुवातीलाच दिसते ती प्रचंड जनसमुदायानं भरलेली सभा… झलक महाराष्ट्राच्या लाडक्या व्यक्तिमत्वाची … जमलेल्या माझ्या तमाम हिंदू बांधवानो, भगिनींनो आणि मातांनो, हा अवघ्या महाराष्ट्राच्या ओळखीचा खणखणीत आवाज… उत्साह, जल्लोष… दिसत आहे. तर दुसऱ्या क्षणी दिसतात दंगल, मारामारी, जाळपोळ आणि धुडगूस! यामध्येच ‘ठाकरे साहेब’ असा हलकासा आवाजही कानावर येतो. राज ठाकरेंचा आवाज या टीझरमध्ये असल्याचं म्हटलं जातंय.
झी स्टुडिओज् आणि नाडियाडवाला ग्रँडसन एंटरटेनमेंटची प्रस्तुती असलेल्या सह्याद्री फिल्म्स निर्मित ‘येक नंबर’ या चित्रपटाचा टीझर पाहून प्रेक्षकांच्या मनात आता बरेच कुतूहल निर्माण झाले आहे, तसेच असंख्य प्रश्न उभे राहिले आहेत आणि येत्या १० ऑक्टोबरला या सगळ्या प्रश्नांची उत्तरे प्रेक्षकांना मिळणार आहेत.
