नागपूर प्रतिनिधी :
दि. १८ डिसेंबर २०२४
भाजपा नेते आणि माजी मंत्री आ. प्रा. राम शिंदे जी यांची विधानपरिषद सभापती पदासाठी महायुतीचे अधिकृत उमेदवार म्हणून निवड करण्यात आली आहे. त्यांनी आपला उमेदवारी अर्ज आज दाखल केला. यावेळी मुख्यमंत्री मा. देवेंद्रजी फडणवीस, उपमुख्यमंत्री मा. अजितदादा पवार, प्रदेशाध्यक्ष व मंत्री मा. चंद्रशेखर बावनकुळेजी, महायुतीचे नेते आदी उपस्थित होते.
कर्जत जामखेड सारख्या ग्रामीण भागातील तळागाळातून आलेले अभ्यासू आणि लढाऊ नेतृत्व अशी आ. प्रा. राम शिंदे यांची ओळख आहे. ते राज्याच्या वरिष्ठ सभागृहाचे कामकाज सुरळीत आणि समन्यायी भावनेतून पार पाडतील, अशी प्रतिक्रिया सर्वत्र व्यक्त होते आहे.
“महायुतीचे आमचे नेते देवेंद्र फडणवीस, एकनाथ शिंदे आणि अजित पवार यांनी विधानपरिषदेचा सभापती म्हणून माझ्या नावाची शिफारस केली. परिषदेचा सभापती बिनविरोध निवडून यावा, अशी इच्छा त्यांनी व्यक्त केली होती. विरोधकांनी त्याचा मान ठेवत माझ्या निवडीला पाठींबा दिला आहे. याबद्दल महायुती आणि विरोधकांचे मी आभार मानतो. राजकारणात चर्चा महत्त्वाची आहे. मी विधानसभेची निवडणूक हरल्यानंतरही माझे नाव मंत्री, प्रदेशाध्यक्ष यासाठी चर्चेत होते. माझ्या पक्षाला माझ्यावर विश्वास असल्यामुळे त्यांनी मला योग्य सन्मान मिळवून दिला आहे. त्यांनी दिलेल्या या संधीचे मी नक्कीच सोने करीन”, अशी भावना भाजपचे आमदार, विधानपरिषद सदस्य राम शिंदे यांनी बुधवारी विधानभवन परिसरात प्रसारमाध्यमांशी बोलताना व्यक्त केली.
