अकोला प्रतिनिधी :
दि. १३ फेब्रुवारी २०२५
अकोला जिल्ह्यातील मूर्तिजापूर मतदार संघाचे राष्ट्रवादी काँग्रेसचे (अजित पवार) माजी आमदार तथा वैधानिक विकास महामंडळाचे माजी अध्यक्ष तुकाराम बिरकड यांचा अकोला ते मूर्तिजापूर राष्ट्रीय महामार्गावर शिवानी टी पॉइंट जवळ दुर्दैवी अपघात झाला. या अपघातात तुकाराम बिरकड यांचा दुर्दैवी मृत्यू झाल्याची घटना घडली आहे. या अपघातात मालवाहू टाटा वाहनाने बिरकड यांच्या दुचाकी वाहनाला दिलेल्या जबरदस्त धडकेने त्यांचा जागीच मृत्यू झाल्याचे सांगण्यात येत आहे. अपघातानंतर त्यांना तातडीने स्थानिक खासगी हॉस्पिटलला दाखल करण्यात आले. धडक देणारे मालवाहू वाहन हे गुरांची वाहतूक करीत असल्याने काही पोलिस त्या वाहनाचा पाठलाग करीत होते. तेव्हा या वाहनचालकाने आपले वाहन वेगाने पुढे नेण्याचा प्रयत्न केला आणि त्यातच हा दुर्दैवी अपघात घडला असल्याचे सांगण्यात येत आहे.
आज अकोला शहरातील सिटी स्पोर्ट्स क्लब येथे भारतीय जनता पक्षाच्या अमरावती विभागातील नेत्यांची आणि कार्यकर्त्यांची बैठक होती. या बैठकीला पाच ही जिल्ह्यातील सुमारे ८०० कार्यकर्ते उपस्थित होते. या बैठकीला राज्याचे महसूल मंत्री चंद्रशेखर बावनकुळे, कामगार मंत्री आकाश फुंडकर, आदिवासी विकास मंत्री अशोक उईके उपस्थित होते. माजी आमदार तुकाराम बिडकर हे चंद्रशेखर बावनकुळे यांच्या भेटीसाठी सिटी स्पोर्ट्स क्लब येथे गेले होते. भेटीनंतर मोटारसायकलवर परत येताना जनावरे वाहून नेणाऱ्या मालवाहू वाहनाने मोटरसायकलला जबर धडक दिली. या धडकेत तुकाराम बिरकड यांच्यासह त्यांच्यासोबत असलेले त्यांचे सहकारी यांचा सुद्धा मृत्यू झाला.
दोन दिवसांनी सहपरिवार महाकुंभ मेळ्यात जाणार होते. मात्र, नियतीने आधीच आपला डाव साधला आणि काळाने बिरकड यांच्यावर घाला घातला. अपघाताची वार्ता कळताच परिवाराने आक्रोश केला. तुकाराम बिरकड यांच्या पत्नी, भाऊ प्रकाश बिरकड, शत्रूघन बिरकड यांना अश्रू अनावर झाले होते.
अपघाताची माहिती मिळताच एमआयडीसी पोलिसांनी घटनास्थळी धाव घेतली, जखमींना रुग्णालयात दाखल केले व अपघातातील वाहन जप्त करून, वाहन चालकासह त्याच्या साथीदारांना ताबडतोब ताब्यात घेतले.
तुकाराम बिरकड यांच्या अपघाती निधनाची वार्ता कळताच अकोल्यातील राजकीय क्षेत्रात शोककळा पसरली. बिरकड यांना ज्या खासगी रुग्णालयात दाखल केले होते, त्या ठिकाणी अकोला जिल्ह्यातील सर्वच पक्षांच्या राजकीय नेत्यांनी हजेरी लावत सांत्वनपर भेट दिली. यावेळी भाजप, वंचित बहुजन आघाडी, राष्ट्रवादी काँग्रेस, काँग्रेसच्या आमदारांसह असंख्या कार्यकर्ते या ठिकाणी उपस्थित होते.
