डीडी न्यूज प्रतिनिधी :
दि. ०५ मार्च २०२५
विराट कोहीलीने धडाकेबाज फलंदाजी करत ८४ धावा केल्या आणि सामनावीर पुरस्कारही मिळवला. पण त्यानंतरही बीसीसीआयचे मेडल विराट कोहलीला मिळू शकले नाही. हे मेडल देण्यासाठी ड्रेसिंग रुममध्ये भारताचे माजी कर्णधार आणि प्रशिक्षक रवी शास्त्री यांना आमंत्रित करण्यात आले होते. रवी शास्त्री यांनी यावेळी कोणाला मेडल दिले, याचा व्हिडिओ आता चांगलाच व्हायरल झाला आहे.
विराट कोहलीने पाकिस्तानच्या सामन्यासारखी फलंदाजी ऑस्ट्रेलियाच्या सामन्यातही केली. पण विराटने पाकिस्तानच्या सामन्यात शतक झळकावले होते, पण ऑस्ट्रेलियाच्या सामन्यात मात्र त्याला शतकाने हुलकावणी दिली. पण विराट कोहलीनेच भारताच्या या विजयात मोलाचा वाटा उचलला होता आणि संघाला फायनलमध्ये प्रवेश करुन दिला. पण बीसीसीआयच्या मनात मात्र वेगळचं असल्याचं यावेळी पाहायला मिळालं.
रवी शास्त्री हे ड्रेसिंग रुममध्ये आले आणि वातावरण उत्साही झाले. कारण रवी शास्त्री यांना ड्रेसिंग रुममध्ये आल्यावर लगेच भारतीय खेळाडूंना आपल्या शब्दलालित्याने चार्ज केले. रवी यांनी रोहित शर्माची भेट घेतली, त्यानंतर विराट कोहली आणि हार्दिक पंड्या यांनाही मिठी मारली. त्यानंतर रवी शास्त्री यांनी भारताची कामगिरी कशी सुरु आहे, यावर आपली टिप्पणी केली आणि त्यानंतर बीसीसीआयचे हे मेडल कोणाला मिळणार, याची घोषणा करायला सुरुवात केली. ही घोषणा करताना रवी शास्त्री यांनी बरेच बारकावे सांगितले. त्यानंतर रवी शास्त्री यांनी श्रेयस अय्यरला हे बीसीसीआयचं मेडल दिलं. श्रेयस अय्यरला हे मेडल का मिळालं, याचंही कारण यावेळी सांगण्यात आलं.
ऑस्ट्रेलिया यष्टीरक्षक ॲलेक्स कॅरी हा दमदार फलंदाजी करत होता. पण कॅरीला यावेळी श्रेयस अय्यरने डायरेक्ट थ्रो करत रन आऊट केले. त्यामुळे भारताला ऑस्ट्रेलियाच्या धावसंख्येवर लगाम लावता आला. त्यामुळे यावेळी बीसीसीआयने हे मेडल श्रेयस अय्यरला दिल्याचे समोर आले आहे.
श्रेयस अय्यरने त्यानंतर फलंदाजीतही चांगली कामगिरी केली. भारताचे दोन्ही सलामीवीर बाद झाल्यावर श्रेयसने विराटच्या साथीने भारतीय संघाला चांगली भागीदारी मिळवून दिली.
