मुंबई प्रतिनिधी :
दि. ०६ मार्च २०२५
धनंजय मुंडे यांनी मंत्रि‍पदाचा राजीनामा दिला आहे. सोमवारी मस्साजोगचे सरपंच सतोंष देशमुख हत्येचे अत्यंत भयावह फोटो व्हायरल झाले त्यानंतर संपूर्ण महाराष्ट्रात जनक्षोभ उसळला होता. त्यानंतर हा राजीनामा देण्यात आला आहे. नैतिकतेच्या आधारावर पदाचा राजीनामा दिल्याचे सांगितल जात आहे. या राजीनाम्यावर सामाजिक कार्यकर्त्या अंजली दमानिया यांनी प्रतिक्रिया दिली आहे. त्या म्हणाल्या की, राजीनामा का घेतला त्यांना उचलून बाहेर का फेकलं गेलं नाही. त्यांना बडतर्फ करायला पाहिजे होते. त्यांचा राजीनामा घेऊन आपण काय करतो आहे? मुख्यमंत्र्यांनी त्यांना उचलून राजकारणातून बाहेर फेकायला हवं होत.
दमानिया पुढे म्हणाल्या, मला ऐवढा राग येत आहे की सामान्य लोकांना वाल्मिक कराडसारखी माणसं चिरडून जातात. त्यांना व्हीव्हीआयपी ट्रीटमेंट देणार असे राजकारणी. हे सुद्धा त्यांच्यात गुंतलेले आहेत. कारण सगळे पैसे या राजकारण्यांना पुरवले जात होते. यांचा राजीनामा घेण्यासाठी बैठका होतात. यांना उचलून फेकून का दिलं जात नाही.
मुख्यमंत्र्यांना हे व्हिडिओ फोटो माहित नव्हते असं नाही. मला किती जणांचे मेसेज आले. आम्हाला रात्री झोप लागली नाही डोळे बंद झाले की ते फोटो दिसायचे. ज्या माणसाला संवेदना आहे, प्रेम, आपूलकी आहे त्या प्रत्येक माणसाला असं वाटतं.पण आपल्या राजकारण्यांना भावना उरल्या नाहीत. ते बैठका घेतात मग ठरवतात की आपण राजीनामा घ्यायचा की नाही. अजित पवार म्हणतात पुरावे द्या. पुरावे मिळाल्यानंतर आम्ही राजीनामा घेऊ. काय हे कुठल्या स्तरावर आले आहे हे राजकारण. धनंजय मुंडे स्वत:ला समजतात काय? हकालपट्टी करायला पाहिजे होती. मी याचा शोध पुढे सुरू ठेवणार आहे.
सुत्रांच्या माहितीनुसार सोमवारी देवगिरी बंगल्यावर मुख्यमंत्री देवेंद्र फडणवीस, अजित पवार, सुनिल तटकरे आणि धनंजय मुंडे यांच्यात बैठक झाली. त्यावेळी राजीनामा देण्याचा निर्णय झाला होता. ९ डिसेंबर रोजी झालेल्या संतोष देशमुख हत्या प्रकरणानंतर वाल्मिक कराड हा अनेक दिवस फरार होता. गेल्या महिन्यात वाल्मिक कराडला अटक करण्यात आली होती.कराड हा धनंजय मुंडे यांचा कट्टर समर्थक होता. मुंडे यांनी मंत्रि‍पदाचा राजीनामा द्यावा अशी मागणी केली जात होती.
