बीड प्रतिनिधी :
दि. २७ मार्च २०२५
मस्साजोगचे सरपंच संतोष देशमुख यांच्या हत्या प्रकरणाने संपूर्ण राज्यात एकच खळबळ माजली आहे. या हत्याप्रकरणातील आरोपी सुदर्शन घुले, जयराम चाटे आणि महेश केदार यांनी आपल्या गुन्ह्याची कबुली दिली आहे. त्यांनीच संतोष देशमुख यांची हत्या केल्याचं सांगितलं. तर, आता याप्रकरणी काळ्या स्कॉर्पिओतील पुरावे अत्यंत महत्त्वाचे ठरणार आहेत. ही काळी स्कॉर्पिओ या गुन्ह्यात वापरण्यात आली होती. या गाडीत एकून १९ पुरावे आढळून आले आहेत. हे पुरावे आरोपींना शिक्षेपर्यंत नेणार असल्याची माहिती आहे.
या गाडीचा फॉरेन्सिक तपासणीचा अहवाल हाती लागला आहे. या आरोपींना शिक्षेपर्यंत पोहोचवण्यासाठी याच गाडीमधील फिंगरप्रिंट्स आणि हे पुरावे महत्त्वाचे ठरणार आहेत. काळ्या रंगाची स्कार्पिओ पासिंग क्रमांक एम एच ४४ झेड ९३३३ या गाडीवर एकून ९९ ठसे आढळून आले आहेत. डाव्या बाजूच्या दरवाज्यावरील काचेवर २ ठसे मिळाले आहेत. जुळून आलेले फिंगरप्रिंटचे ठसे सुधीर ज्ञानोबा सांगळे या आरोपीचे आहेत, असा अहवाल फिंगरप्रिंट ब्युरोने दिला आहे. ही स्कॉर्पिओ गाडी आरोपी गँगचा म्होरक्या सुदर्शन घुलेची आहे.
संतोष देशमुख यांना कुठे आणि कशी मारहाण केली,हेही प्रतीक घुलेने पंचांसमक्ष सांगितलं आहे. संतोष देशमुख यांची ९ डिसेंबर रोजी टाकळी शिवारात अमानुष मारहाण करत हत्या करण्यात आली होती. यातील आरोपी प्रतीक घुले याला सोबत घेऊन पोलिसांनी घटनास्थळाचा पंचनामा केला होता. यावेळी प्रतीक घुले याने संतोष देशमुख यांना ज्या ठिकाणी मारहाण केली ते ठिकाण दाखवत त्याच्या जवळच असलेल्या एका काटेरी झुडपातून मारहाण करण्यासाठी वापरलेली बांबूची जाड काठी देखील काढून दिली होती. माऊली कारखाना ते टाकळी रोडवर आम्ही संतोष पंडितराव देशमुख यास विविध हत्याराने मारून त्याचा खून केला होता. त्यावेळी मी त्याला मारण्याकरता वापरलेलं हत्यार तेथे लपवून ठेवले आहे ते ठिकाण दाखवतो आणि हत्यार देखील देतो असे प्रतीक घुले याने पंचांसमक्ष सांगितले होते, तो पंचनामा आता समोर आला आहे.
