दिशा सालियनने वडिलांमुळे आत्महत्या केली?

मुंबई प्रतिनिधी :
दि. २८ मार्च २०२५

दिशा सालियन मृत्यू प्रकरणात मोठा ट्विस्ट निर्माण झाला आहे. दिशाच्या वडिलांनी आदित्य ठाकरेंसह (Aaditya Thackeray) काही हाय प्रोफाईल व्यक्तींवर आपल्या मुलीच्या मृत्यूस जबाबदार असल्याचा आरोप केला होता. मात्र, पोलिसांनी यापूर्वी सादर केलेल्या क्लोजर रिपोर्टमध्ये दिशाचे वडील सतीश सालियन हेच तिच्या नैराश्याचे कारण असल्याचा उल्लेख आहे.

८ जून २०२० रोजी दिशा सालियन हिने आत्महत्या केली होती. या घटनेनंतर मालवणी पोलिसांनी तपास करुन एक अहवाल सादर केला होता. त्यात दिशाचे काही प्रोजेक्ट्स अयशस्वी झाले होते, मित्रांशी खटके उडाले होते, अशा कारणांचा उल्लेख होते. याशिवाय महत्त्वाचं म्हणजे दिशाच्या वडिलांनीच लेकीने कष्टाने कमावलेले पैसे आपल्या ऑफिसमधील महिला कर्मचाऱ्यावर उधळल्याचेही नमूद आहे. दिशाने ही गोष्ट तिच्या काही मैत्रिणींना आणि तिच्या होणाऱ्या नवऱ्यालाही सांगितली होती. २ जून २०२० रोजी तिने दिशाने वडिलांना याबद्दल जाब विचारला आणि त्यानंतर ती तिचा होणारा नवरा रोहन रॉय याच्या जनकल्याण नगरमधील फ्लॅटवर राहायला गेली.

दिशाच्या मृत्यूनंतर पोलिसांनी पुरावे गोळा केले आणि साक्षीदारांचे जबाब नोंदवले. यानंतर त्यांनी हा निष्कर्ष काढला की दिशाने आत्महत्या केली. ४ फेब्रुवारी २०२१ रोजी हा क्लोजर रिपोर्ट सादर करण्यात आला. सतीश सालियन यांनी आता पुन्हा याचिका दाखल करून काही बड्या असामींवर आरोप केले आहेत. त्यामुळे हे प्रकरण पुन्हा एकदा चर्चेत आले आहे.

८ आणि ९ जून २०२० च्या दरम्यानच्या रात्री दिशाने मालाड येथील गॅलक्सी टॉवरच्या १२ व्या मजल्यावरून उडी मारली, असा आरोप आहे. तिला तातडीने एव्हरशाईन नर्सिंग होम, तुंगा हॉस्पिटल आणि नंतर शताब्दी हॉस्पिटलमध्ये नेण्यात आले. तिथे डॉक्टरांनी तिला मृत घोषित केले. पोलिसांनी केलेल्या तपासात, तिने ज्या फ्लॅटवरून उडी मारली तो फ्लॅट तिचा होणारा नवरा रोहन रॉय याचा असल्याचे समोर आले. दिशा आणि रोहन २०१४ पासून रिलेशनशिपमध्ये होते. २०१७ मध्ये त्यांनी साखरपुडा केला होता. कोव्हिडनंतर ते लग्न करणार होते.

पोलिसांनी सांगितले की, दिशा सालियन सुरुवातीला तिचे आई-वडील यांच्यासोबत दादरच्या नायगाव येथे राहत होती. मालाडमध्ये फ्लॅट घेतल्यानंतर ती काही दिवस तिथे, तर काही दिवस आई-वडिलांकडे राहत होती. लॉकडाऊनपर्यंत ती आणि रोहन तिच्या वडिलांच्या नायगाव येथील घरी राहत होते. ४ जून २०२० रोजी ते मालाडच्या फ्लॅटवर राहायला आले.

रोहन रॉय हा अभिनेता आणि मॉडेल आहे. त्याने अनेक टीव्ही मालिकांमध्ये काम केले आहे. दिशा सालियन सेलिब्रिटी मॅनेजर होती. तिने दिवंगत अभिनेता सुशांत सिंह राजपूतसोबतही काम केले होते. पोलिसांनी सांगितले की, घटनेच्या वेळी दिशाचा होणारा नवरा रोहन रॉय आणि तिचे शाळकरी मित्र इंद्रनील वैद्य, दीप अजमेरा, हिमांशू शिखरे आणि रेश्मा पडवळ हे तिथे होते. त्यांनी तिला तातडीने हॉस्पिटलमध्ये नेले आणि तिच्या आई-वडिलांना फोन करून शताब्दी हॉस्पिटलमध्ये बोलावले.

तिथे पंचनामा करण्यात आला. तिचे कपडे आणि इतर वस्तू फॉरेन्सिक तपासणीसाठी पाठवण्यात आल्या. कोव्हिड महामारीमुळे तिची स्वॅब टेस्ट करण्यात आली आणि रिपोर्ट येईपर्यंत तिचे पार्थिव एक-दोन दिवस ठेवण्यात आले. रिपोर्ट निगेटिव्ह आल्यानंतर बोरिवली येथील भगवती हॉस्पिटलमध्ये तिचे शवविच्छेदन करण्यात आले.

शवविच्छेदन अहवालात असे म्हटले आहे की, दिशाचा मृत्यू अनेक जखमांमुळे झाला आहे. हा एक अपघाती मृत्यू होता. पोलिसांनी तिचे मित्र, होणारा नवरा रोहन आणि तिचे आई-वडील यांचे जबाब नोंदवले. सगळ्यांनी सांगितले की, दिशा तिच्या कामामुळे आणि कौटुंबिक समस्यांमुळे तणावात होती. ती कॉर्नरस्टोन कंपनीमध्ये सेलिब्रिटी मॅनेजर म्हणून काम करत होती. तिने घेतलेले दोन प्रोजेक्ट्स रखडले होते, त्यामुळे ती नाराज होती. तिच्या सगळ्या मित्र-मैत्रिणींनी आणि रोहनने पोलिसांना सांगितले की, दिशाने तिच्या वडिलांच्या अफेअरबद्दल आणि त्यांनी तिचे पैसे एका महिलेवर खर्च केल्याबद्दल सांगितले होते. त्यामुळे ती खूप दुःखी होती.

क्लोजर रिपोर्टनुसार, ८ जून २०२० रोजी दिशाने तिच्या फ्लॅटवर मित्र इंद्रनील आणि दीप यांच्यासाठी बर्थडे पार्टी ठेवली होती. संध्याकाळी ७ वाजता पार्टी सुरू झाली. तिथे गाणी आणि मद्यपान सुरू होते. रात्री ११:४५ वाजता दिशाला लंडनमध्ये राहणारी तिची मैत्रीण अंकिताचा फोन आला, त्यामुळे ती बेडरूममध्ये गेली. बाकीचे मित्र नंतर तिला भेटायला गेले. हिमांशू हॉलमध्ये परत आला. त्यानंतर दिशा तणावात दिसली. थोड्या वेळाने तिने स्वतःला बेडरूममध्ये बंद करून घेतले. रोहनच्या मित्रांना ती दिसली नाही, तेव्हा त्यांनी त्याला सांगितले. त्याने दरवाजा ठोठावला, पण आतून काही प्रतिसाद आला नाही. ती बाथरूममध्ये असेल, असे समजून त्याने दुर्लक्ष केले. पुन्हा ठोठावल्यावरही काही आवाज न आल्याने त्यांनी दरवाजा तोडला. आत पाहिलं तर रूम रिकामी होती. बाथरूममध्येही कोणी नव्हतं. खिडकी उघडी दिसल्याने त्यांनी बाहेर पाहिलं, तेव्हा दिशा एका गाडीजवळ पडलेली दिसली.