सोलापूर प्रतिनिधी :
दि. ३१ मार्च २०२५
सोलापुरात एका अट्टल चोरट्याला पोलिसांनी अटक केली आहे. हा चोरटा चोरी करण्यासाठी हजारो रुपये खर्च करून विमानाने प्रवास करायचा. जिथे चोरी करायची आहे, त्या शहरात गुन्हा करून तो पुन्हा विमानाने आपल्या मूळगावी परतायचा. धक्कादायक बाब म्हणजे हा घरफोडी करणारा भामटा एक कोटींच्या बंगल्यात राहत असल्याची माहिती तपासात समोर आली आहे. अनिल कुमार मिस्त्रीलाल राजभर असे त्याचे नाव असून त्याच्यावर ३५ गुन्हे दाखल आहेत.
उत्तर प्रदेशमधून महाराष्ट्रात विमानप्रवास करून हा चोरटा मुंबईत यायचा. यानंतर तो रेल्वेने सोलापूर गाठायचा. सोलापुरात घरफोडी केल्यानंतर परत तो – उत्तर प्रदेश येथील लखनऊला जायचा. त्यासाठी मुंबईतून तो विमानाने प्रवास करायचा. आंतरराज्य चोऱ्या, घरफोड्या करणाऱ्या या अट्टल चोराला गुन्हे शाखेच्या पथकाने जेरबंद केले आहे.. सोलापुरातील शिक्षणाधिकाऱ्याच्या घरी कोणी नसताना घरफोडी करून चोरी करणाऱ्या प्रकरणात आंतरराज्य गुन्हेगाराला सोलापूर गुन्हे शाखेने ताब्यात घेतले आहे.
अलीकडेच सोलापुरात शिक्षणधिकाऱ्याच्या घरी त्याने चोरी केली होती. त्यानंतर तो उत्तर प्रदेशात निघून गेला. मात्र सोलापूर स्थानिक गुन्हे शाखेला तो पुन्हा सोलापुरात येत असल्याची माहिती मिळाली. गुन्हे शाखेच्या अधिकाऱ्यांनी कसून तपास केल्यानंतर राजभर हा पोलिसांच्या ताब्यात आला.
