नागपूर प्रतिनिधी : अनिल पवार
दि. २६ मे २०२५
देवरी एकात्मिक आदिवासी विकास प्रकल्पांतर्गत बोरगाव येथील शासकीय आश्रमशाळेत १ ते ३१ मे २०२५ या कालावधीत विद्यार्थ्यांसाठी बौद्धिक व शारीरिक विकास उन्हाळी शिबिराचे आयोजन करण्यात आले. या शिबिरात विद्यार्थ्यांच्या सर्वांगीण विकासासाठी विविध उपक्रम राबवण्यात आले. याचाच एक भाग म्हणून विद्यार्थ्यांसाठी नागपूर मेट्रो सफर या अभ्यास दौऱ्याचे आयोजन करण्यात आले, ज्यामध्ये त्यांनी आपल्या कलाकौशल्याचे उत्कृष्ट प्रदर्शन केले.नागपूर मेट्रोच्या प्रवासादरम्यान विद्यार्थ्यांनी समर कॅम्पमध्ये शिकलेल्या कला सादर केल्या. विशेष म्हणजे, त्यांनी धावत्या मेट्रोमध्ये रांगोळीद्वारे महामहीम राष्ट्रपती द्रौपदी मुर्मू यांचे रेखाचित्र रेखाटले. यासोबतच क्ले आर्ट्सच्या माध्यमातून भगवान बिरसा मुंडा यांची आकर्षक कलाकृती तयार केली. या कलाकृतींनी उपस्थितांचे लक्ष वेधून घेतले आणि विद्यार्थ्यांच्या सर्जनशीलतेची प्रशंसा झाली.या प्रसंगी अपर आयुक्त आयुषी सिंग, उपायुक्त दिगंबर चव्हाण, प्रकल्प अधिकारी उमेश काशिद, नितीन इसोकर, सहाय्यक प्रकल्प अधिकारी श्री. झाडे, श्री. सोनावणे, श्री. भुसारी, कपिल शर्मा, श्रीम. उईके, मेश्राम आणि मुख्याध्यापक श्री. खेडकर यांनी मेट्रो प्रवासात सहभाग घेत विद्यार्थ्यांशी संवाद साधला. त्यांनी विद्यार्थ्यांचे कौतुक करत त्यांना प्रोत्साहन दिले.हे शिबिर आणि अभ्यास दौरा विद्यार्थ्यांच्या बौद्धिक व शारीरिक विकासासोबतच त्यांच्या सर्जनशीलतेला चालना देणारा ठरला. नागपूर मेट्रोमधील या अनोख्या उपक्रमाने आदिवासी विद्यार्थ्यांच्या कलागुणांना व्यापक व्यासपीठ मिळाले.
