पुणे प्रतिनिधी :
दि. ३० मे २०२५
पुण्यात राष्ट्रवादी काँग्रेसचे माजी शहराध्यक्ष दीपक मानकर यांच्या अडचणी वाढल्या आहेत. त्यांच्यावर बनावट कागदपत्रे सादर केल्याचा आरोप आहे. या प्रकरणी आता त्यांचे पुत्र करण मानकर आणि व्याही सुखेन शहा यांच्यावरही गुन्हे दाखल झाले आहेत. समर्थ पोलीस स्टेशनमध्ये हे गुन्हे दाखल झाले आहेत. शंतनू कुकडे नावाच्या व्यक्तीच्या बँक खात्यातील संशयास्पद व्यवहारामुळे हे प्रकरण उघडकीस आले. कुकडेच्या खात्यातून मानकर पिता-पुत्रांच्या खात्यात आणि सुखेन शहा यांच्या खात्यात मोठी रक्कम वर्ग झाली होती. या संदर्भात पोलिसांनी चौकशी सुरू केली आहे.
समर्थ पोलीस स्टेशनचे वरिष्ठ पोलीस निरीक्षक उमेश गित्ते यांनी या प्रकरणी तक्रार दाखल केली आहे. त्यानुसार दोन गुन्हे दाखल झाले आहेत. एका गुन्ह्यात शंतनू सॅम्युअल कुकडे, सुखेन सुरेशचंद्र शहा, रौनक भरत जैन आणि इतर काही जणांचा समावेश आहे. तर दुसऱ्या गुन्ह्यात शंतनू सॅम्युअल कुकडे, करण दीपक मानकर आणि इतरांना आरोपी करण्यात आले आहे. शंतनू कुकडे याच्यावर एका विदेशी तरुणीला आश्रय देण्याच्या बहाण्याने तिच्यावर बलात्कार केल्याचा आरोप आहे. त्याच्यावर समर्थ पोलीस स्टेशनमध्ये आधीच पाच गुन्हे दाखल आहेत. धक्कादायक बाब म्हणजे त्याच्या बँक खात्यात तब्बल १०० कोटी रुपयांचे व्यवहार झाले आहेत.
पोलिसांनी केलेल्या तपासात असे समोर आले आहे की, कुकडेच्या बँक खात्यातून मानकर पिता-पुत्रांच्या खात्यात सुमारे पावणेदोन कोटी रुपये वर्ग झाले होते. तसेच, करण मानकर यांचे सासरे सुखेन शहा यांच्या खात्यात तब्बल सहा कोटी ५२ लाख रुपये वर्ग झाले आहेत. या व्यवहारांबाबत पोलिसांनी मानकर यांच्याकडे विचारणा केली. त्यावेळी त्यांनी कुकडेसोबत जमीन खरेदीचा कोणताही व्यवहार झाला नसल्याचे सांगितले. त्यांनी काही कागदपत्रे सादर केली, पण ती बनावट असल्याचे पोलिसांना आढळून आले.
सुखेन शहा यांनी पोलिसांना सांगितले की, त्यांचा मुलगा सिद्धांत मुळशी येथे १० एकर जागेवर रिसॉर्ट बनवणार होता. त्यासाठी शंतनू कुकडेने ५ कोटी २२ लाख रुपये आणि रौनक जैनने १ कोटी ३० लाख रुपये गुंतवले होते. त्यांनी या संदर्भात स्टॅम्प पेपरवर केलेला करारही सादर केला. मात्र, पोलिसांनी तपासणी केली असता तो करारही बनावट असल्याचे उघड झाले. त्यामुळे सुखेन शहा यांच्यावरही गुन्हा दाखल करण्यात आला आहे.
दरम्यान, पुणे शहराचे पोलीस आयुक्त अमितेश कुमार स्वतः या प्रकरणावर लक्ष ठेवून आहेत. त्यामुळे या प्रकरणातील सत्य लवकरच समोर येईल, अशी शक्यता आहे.
