उदगीर प्रतिनिधी :
दि. ३० मे २०२५
शंभर रुपयांच्या बॉन्डवर बेकायदेशीरपणे दीड वर्षाच्या बाळाला दत्तक पत्र करून दिल्याप्रकरणी आठ जणांविरोधात उदगीर शहर पोलीस ठाण्यात गुन्हा दाखल करण्यात आला आहे. लातूर जिल्हा बाल संरक्षण अधिकारी धम्मानंद कांबळे यांनी उदगीर पोलिसात दिलेल्या तक्रारीनुसार दहा ते बारा सप्टेंबर दरम्यान उदगीर येथे आरोपी परविन अलाउद्दीन पिंजारी यांची मुलगी मेहक हिने जन्म दिलेले बाळ महबूब यास आरोपी जमीन अहमद बागवान व अहमदनगर बागवान यांनी शंभर रुपयांच्या बॉन्ड पेपरवर बेकायदेशीरपणे दत्तक पत्र करून दिले. यासह अन्य लोकांनी बॉन्डवर सह्या केल्या आहेत. यामुळे उदगीर शहर पोलीस ठाण्यात आठ जणांविरुद्ध गुन्हा दाखल करण्यात आला आहे.
कुटुंबातील असलेली अडचण दूर व्हावी यासाठी दत्तक दिले असल्याची कबुली परविन पिंजारी यांनी दिली आहे. आधीच तीन मुली त्यानंतर ही चौथी मुलगी झाली यामुळे हे बाळ शंभर रुपयांच्या बॉन्डवर दत्तक पत्र करून कायदेशीर रित्या दत्तक दिल्याचे त्यांचे म्हणणे आहे. इतक्या बाळांचा सांभाळ करण्यासाठी होणारा खर्च परवडणारा नसल्याकारणाने आम्ही दत्तक दिले असल्याची कबुली पोलीस ठाण्यातील चौकशीमध्ये परवीनने दिली आहे. आम्हाला हे सर्व कायद्याने गुन्हा ठरतो हे माहीत नसल्यामुळे आम्ही असे दत्तक पत्र केले आहे असे, आरोपी महिलेचे म्हणणे आहे.
लातूरमधील या प्रकारानंतर मोठी खळबळ उडाल्याचे बघायला मिळतंय. आरोपींनी हे देखील स्पष्ट केले की, अगोदरच तीन मुली असताना परत ही मुलगी झाली आणि सर्व पालनपोषण करणे शक्य होत नसल्याचे त्यांनी सांगितले. याशिवायच त्यांचे म्हणणे आहे की, अशाप्रकारे बाळ दत्तक करणे गुन्हा असल्याची आपल्याला कोणतीही कल्पना नव्हती. मात्र, या प्रकारामुळे खळबळ उडाली. याप्रकरणी पोलिसांनी तब्बल आठ जणांच्या विरोधात गुन्हा दाखल केला आहे. शंभर रुपयांच्या बॉन्ड पेपरवर त्यांनी सह्या केल्या होत्या.
