नागपूर प्रतिनिधी : अनिल पवार
दि. ८ जून २०२५ :
नागपूर जिल्ह्यातील पारधी समाजाच्या सर्वांगीण विकासासाठी आणि सामाजिक उत्थानासाठी महसूलमंत्री तथा पालकमंत्री चंद्रशेखर बावनकुळे यांनी केलेल्या प्रशंसनीय कार्याबद्दल आदिवासी पारधी विकास परिषदेच्या शिष्टमंडळाने त्यांची भेट घेऊन हार्दिक अभिनंदन केले. बावनकुळे यांच्या संवेदनशील नेतृत्वाखाली पारधी समाजाच्या शैक्षणिक, सामाजिक आणि आर्थिक प्रगतीसाठी राबविलेल्या योजनांचे परिषदेने कौतुक केले. यावेळी समाजाच्या विविध मागण्यांचे निवेदनही त्यांना सादर करण्यात आले.
आदिवासी पारधी विकास परिषदेने आपल्या निवेदनात नमूद केले की, महसूल पालकमंत्री बावनकुळे यांनी हजारो पारधी विद्यार्थ्यांना जात प्रमाणपत्र मिळवून देण्यासाठी आणि बेडे पाड्या वस्त्यांवर आदिवासी विकास विभागामार्फत मूलभूत सुविधा पुरविण्यासाठी घेतलेला पुढाकार अतुलनीय आहे. त्यांच्या प्रयत्नांमुळे पारधी समाजाला मुख्य प्रवाहात येण्यासाठी मोलाची मदत झाली असून, कल्याणकारी योजनांमुळे समाजात नवचैतन्य निर्माण झाले आहे. परिषदेने बावनकुळे यांच्या कार्याला सलाम करत भविष्यातही त्यांच्या सहकार्याने समाजविकासासाठी कार्यरत राहण्याचा संकल्प व्यक्त केला.
या भेटीदरम्यान आदिवासी पारधी विकास परिषदेने काही महत्त्वपूर्ण मागण्या बावनकुळे यांच्यासमोर मांडल्या. यामध्ये 1952 चा सरायीत गुन्हेगार कायदा (हॅबीच्यूअल ऑफेंडर्स कायदा) रद्द करणे व महाराष्ट्र राज्य अनुसूचित जमाती आयोगाच्या सदस्यांमध्ये आदिवासी पारधी समाजातील उच्चशिक्षित व्यक्तीची अशासकीय पदावर नियुक्ती करण्याची मागणी तसेच पारधी समाजाच्या सामाजिक, आर्थिक, शैक्षणिक आणि न्यायिक समस्यांवर चर्चेसाठी विशेष बैठकीचे आयोजन करण्याची विनंती समाविष्ट आहे. याशिवाय, छत्रपती शिवाजी महाराजस्व अभियानातून सर्व जिल्ह्यातील पारधी समाजाच्या विद्यार्थ्यांना जात प्रमाणपत्र, रेशन कार्ड, आधार कार्ड मतदार नोंदणी, आदी महसूल दाखले, राहत्या घरांचे मालकी हक्क, तसेच वन, गायरान आणि कसत असलेल्या शेतजमिनींचे मालकी हक्काचे पट्टे प्रदान करण्याची मागणी करण्यात आली. राज्यातील सर्व पारधी बेड्यांवर पायाभूत सुविधा पुरविण्याचाही आग्रह आदिवासी पारधी विकास परिषदेने धरला.
या भेटीत आदिवासी पारधी विकास परिषदेचे विदर्भाध्यक्ष बबन गोरामन, उपाध्यक्ष मंगल भोसले, युवा प्रदेशाध्यक्ष अतिश पवार, नागपूर जिल्हाध्यक्ष अनिल पवार, महासचिव राहुल राजपूत, शिवसाजन राजपूत यांच्यासह परिषदेचे शिष्टमंडळ उपस्थित होते. शिष्टमंडळाने राज्याचे महसूल व पालकमंत्री बावनकुळे यांना पुढील कार्यासाठी शुभेच्छा देत अभिनंदन पत्राद्वारे त्यांच्या कार्याची प्रशंसा केली.
आदिवासी पारधी विकास परिषदेच्या या भेटीने चंद्रशेखर बावनकुळे यांच्या पारधी समाजाच्या विकासासाठी असलेल्या बांधिलकीवर शिक्कामोर्तब झाले आहे. त्यांच्या मार्गदर्शनाखाली राबविल्या जाणाऱ्या योजनांनी समाजात सकारात्मक बदल घडवले असून, या प्रयत्नांना परिषदेने प्रेरणादायी म्हटले आहे. ही भेट पारधी समाजाच्या उज्ज्वल भविष्यासाठी एक महत्त्वपूर्ण पाऊल ठरली आहे.
