यवतमाळ प्रतिनिधी : अनिल पवार
दि. १० जून २०२५ :
यवतमाळ जिल्ह्यातील पारधी समाजाच्या सर्वांगीण विकासासाठी आज दुपारी १२ वाजता जिल्हाधिकारी कार्यालयात जिल्हाधिकारी विकास मीना यांच्या अध्यक्षतेखाली विशेष बैठकीचे आयोजन करण्यात आले. आदिवासी पारधी विकास परिषदेचे विदर्भाध्यक्ष बबन गोरामन, प्रदेश युवा अध्यक्ष अतिश पवार, अनिल पवार यांच्या मार्गदर्शनाखाली यवतमाळ जिल्हाध्यक्ष मनीष भोसले, बबन पवार, धर्मराज भोसले, मीतेश धुलिचंद भोसले, पूजा चव्हाण, नितेश भोसले, अनाडी भोसले, राजेश पवार आदींनी या बैठकीत सहभाग घेतला.
या बैठकीत आर्णी तालुक्यातील कारेगाव/कठोडा पारधी बेडा आणि नेर तालुक्यातील अजंती पारधी बेड्यावरील मूलभूत सुविधांवर चर्चा झाली. रस्ते, पिण्याचे पाणी, घरकुल, राहत्या घरांचे पट्टे, अंगणवाडी, शाळकरी विद्यार्थ्यांना विविध महसूल दाखले मिळावेत याकरिता पारधी बेडा तिथे छत्रपती शिवाजी महाराज महाराजस्व समाधान शिबिराचे आयोजन करणे, यासह विविध समस्यांवर उपाययोजना सुचवण्यात आल्या. यावेळी उपविभागीय अधिकारी, तहसीलदार, गटविकास अधिकारी आणि संबंधित विभागांचे वरिष्ठ अधिकारी उपस्थित होते.
पारधी समाजाच्या सामाजिक, शैक्षणिक आणि आर्थिक उन्नतीसाठी ठोस पावले उचलण्याच्या दृष्टीने ही बैठक महत्त्वपूर्ण मानली जात आहे. आदिवासी पारधी विकास परिषदेने समाजाच्या समस्यांना वाचा फोडत सरकारी योजनांचा लाभ मिळवण्याची अपेक्षा व्यक्त केली. गेल्या दोन वर्षांपासून परिषद, आर्णी आणि नेर तालुक्यातील पारधी बेड्यांच्या विकासासाठी सातत्याने पाठपुरावा करत आहे. या सततच्या प्रयत्नांमुळे ही बैठक आयोजित झाल्याचे परिषदेच्या शिष्टमंडळाने सांगितले.
आदिवासी पारधी विकास परिषदेने पारधी समाजाच्या कल्याणासाठी शासन स्तरावर सतत पाठपुरावा सुरू ठेवण्याचे आश्वासन दिले. ही बैठक पारधी समाजाच्या विकासासाठी मैलाचा दगड ठरेल, असा विश्वास आदिवासी पारधी विकास परिषदेने व्यक्त केला.
