इंदूर प्रतिनिधी :
दि. १२ जून २०२५
मेघालय राजा रघुवंशी हत्याकांडने संपूर्ण देश हादरला आहे. याप्रकरणात दररोज आरोपी पत्नी सोनम रघुवंशी चा एक नवा कारनामा समोर येत आहे. सोनम रघुवंशी आणि तिचा कथित प्रियकर राज कुशवाहा यांच्या प्रकरणात, तपासकर्त्यांना संशय आहे की सोनमच या संपूर्ण कटाची सूत्रधार असू शकते. सोनमने यासाठी फक्त राजचा वापर केला असावा असा संशय पोलिसांना आहे. राजला प्रेमाच्या जाळ्यात ओढून त्याला हा गुन्हा करण्यास प्रवृत्त केलं असावं. पोलीस आता या प्रकरणाचा सखोल तपास करत आहेत. सोनमने राजला फसवले आणि त्याचा या कटात वापर केल्याचा संशय पोलिसांना आहे.
याप्रकरणी तपास करणाऱ्या वरिष्ठ पोलिस अधिकाऱ्यांच्या मते, सोनमने सर्व आरोपींना आपल्या जाळ्यात अडकवले होते. तिने राजला प्रेमाचे आश्वासन दिले आणि इतरांना पैशाचे आमिष दाखवले. पूर्वी असे वाटत होते की राज हा कटाचा मुख्य सूत्रधार असेल. परंतु आता असे दिसून येत आहे की तो फक्त एक मोहरा होता. सोनम दुसऱ्या कोणासोबत तरी पळून जाण्याचा विचार करत होती आणि राजला याची काहीच कल्पना नव्हती, असा पोलिसांना संशय आहे.
क्राइम ब्रँचच्या अधिकाऱ्यांनुसार, सोनमने आधीच लपण्यासाठी ठिकाण निवडलं होतं. तिने इंदूरमध्ये फ्लॅटची सोय केली होती. राजाची हत्या केल्यानंतर काही दिवस इंदूरच्या या फ्लॅटमध्ये राहण्याची तिची योजना होती. तिने हा फ्लॅट भाड्याने घेतला होता, त्याचे पैसेही दिले होते. पण, तिच्या या ठिकाण्याबाबत कोणालाही माहिती नव्हती. तिने राजलाही याबाबत कुठली कल्पना दिलेली नव्हती.
राजाची हत्या केल्यानंतर बराच काळ सोनम इंदूरमध्येच राहिल्याचाही संशय अधिकाऱ्यांना आहे. जेव्हा पोलीस आणि तिचे कुटुंबीय तिला शोधत होते तेव्हा ती या फ्लॅटवर लपून बसलेली होती. जेव्हा सोनमला वाटलं की तिचा प्लॅन आता अपयशी ठरत आहे. तेव्हा तिने राजला कॅब बुक करण्यास सांगितले आणि ती उत्तर प्रदेशला पळून गेली. 8 जून रोजी तिला तिथून अटक करण्यात आली.
