अहमदाबाद प्रतिनिधी :
दि. १३ जून २०२५
अहमदाबाद येथे झालेल्या विमान अपघातात गुजरातचे माजी मुख्यमंत्री विजय रुपाणी यांच्यासह 200 हून अधिक प्रवाशांचे दुर्दैवी निधन झाले आहे. विजय रुपाणी यांच्या निधनाच्या वृत्ताला गुजरात भाजपचे प्रदेशाध्यक्ष सी. आर. पाटील यांनी दुजोरा दिला आहे. गृहमंत्री अमित शाहही तातडीने गुजरातमध्ये दाखल झाले आहेत. माजी मुख्यमंत्री विजय रुपाणी यांच्या धाकट्या मुलाचेही कार अपघातात निधन झाले होते.
रूपाणींच्या मुलाचेही अपघाती निधन झाले होते –
विजय रुपाणी हे आपल्या पत्नी आणि मुलीला भेटण्यासाठी लंडनला जात होते मात्र विमान अपघातात त्यांचे निधन झाले. विजय रुपाणी यांचा भाजपच्या महिला मोर्चाच्या नेत्या अंजली यांच्याशी विवाह झाला. त्यांना तीन मुले होती. त्यातील धाकटा मुलगा पुनीत याचे कार अपघातात निधन झाले. पुनीत हा त्यावेळी अवघ्या तीन वर्षाचा होता. त्यानंतर दांम्पत्याने त्याच्या नावाने एक ट्रस्ट सुरू केली. ज्याद्वारे ते लोकांना सहाय्य करत होते. त्यांची मुलगी राधिका ही सीए असून लंडनमध्ये स्थायिक आहे. तर मुलगा इंजिनिअर आहे.
विजय रुपाणींनी 2016 ते 2021 या कालावधीत गुजरातचे मुख्यमंत्रीपद भुषविले होते. त्यांच्या नेतृत्त्वाखाली भाजपने 2017 ची गुजरात विधानसभा निवडणूक लढवली होती. अत्यंत चुरशीच्या निवडणुकीत भाजपने विजय मिळवला होता. त्यानंतर विजय रुपाणींनाच मुख्यमंत्रीपदी भाजप केंद्रीय नेतृत्त्वाने कायम ठेवले होते. 2021 मध्ये विजय रुपाणी यांच्या जागी मुख्यमंत्रीपदी भूपेन पटेल यांची नियुक्ती भाजपने केली.
1970 मध्ये त्यांनी सक्रीय राजकारणात प्रवेश केला होता. अभाविप, जनसंघ आणि आरएसएसशी ते जोडले गले. आणिबाणीच्या काळातही त्यांनी 11 महिने तुरूंगवास भोगला. 90 च्या दशकात ते राजकोटचे महापौर होते. पुढे त्यांनी राजकोट विधानसभा मतदारसंघाचे प्रतिनिधित्व केले. 2006 ते 2012 मध्ये भाजपचे ते राज्यसभा सदस्य होते.
