डीडी न्यूज प्रतिनिधी :
दि. १६ जून २०२५
वैद्यकीय पदवी प्रवेश परीक्षेचा (नीट) निकाल शनिवारी जाहीर करण्यात आला. त्यात महाराष्ट्रातील १ लाख २५ हजार ७२७ विद्यार्थी पात्र ठरले असून पहिल्या दहांत राज्यातील दोन विद्यार्थी झळकले आहेत. कृष्णांग जोशी देशातून तिसरा तर आरव अग्रवाल दहावा आला आहे. राजस्थानचा महेश कुमार देशात पहिला आला. मुलींमध्ये नवी दिल्लीची अविका अगरवाल देशात पहिली आली.
राष्ट्रीय चाचणी संस्थेने (एनटीए) ४ मे रोजी देशविदेशातील एकूण ५ हजार ४६८ केंद्रांवर ‘नीट’ परीक्षा घेतली होती. देशभरात ‘नीट’ दिलेल्या सुमारे २० लाख विद्यार्थ्यांपैकी १२ लाख ३६ हजार ५३१ विद्यार्थी पुढील प्रवेशासाठी पात्र ठरले आहेत. या परीक्षेसाठी राज्यातून एकूण २ लाख ४८ हजार २०१ विद्यार्थ्यांची नोंदणी झाली होती. त्यातील २ लाख ४२ हजार ८५८ विद्यार्थ्यांनी प्रत्यक्ष परीक्षा दिली आणि यापैकी १ लाख २५ हजार ७२७ विद्यार्थी पात्र ठरले आहेत. २०२४ मध्ये ही नोंदणी केलेल्यांची संख्या २ लाख ८२ हजार ५१ होती. त्यापैकी २ लाख ७५ हजार ४४२ विद्यार्थ्यांनी परीक्षा दिली आणि १ लाख ४२ हजार ८२९ विद्यार्थी पात्र ठरले होते. २०२४ च्या तुलनेत २०२५ मध्ये राज्यातील पात्र विद्यार्थी संख्येत १७ हजार १०२ ने घट झाल्याचे दिसून आले आहे.
विद्यार्थ्यांचा वरचष्मा –
‘नीट’ मध्ये सर्वाधिक गुण मिळवणाऱ्या २० मुलींच्या यादीत सिद्धी बढे हिने तिसरा (अखिल भारतीय क्रमांक २६), उर्जा शहा हिने पाचवा (अखिल भारतीय क्रमांक ३१), इश्मित कौर हिने बारावा क्रमांक (अखिल भारतीय क्रमांक ८५) पटकावला आहे. तसेच, २० मुलांच्या यादीत उमेद खान याने एकोणिसावा क्रमांक (अखिल भारतीय क्रमांक २१) पटकावला आहे. ही परीक्षा इंग्रजीप्रमाणेच मराठी, हिंदी, बंगाली, गुजराती, आसामी, कन्नड, उडिया, मल्याळम, तेलगू, पंजाबी, तामिळ, उर्दू अशा तेरा भाषांमध्ये घेण्यात आली.
विद्यार्थ्यांना परीक्षेचा निकाल, गुणवत्ता यादी https://neet.nta.nic.in/ या संकेतस्थळावर पाहता येईल. परदेशात अबूधाबी, दुबई, बँकॉक, कोलंबो, दोहा, काठमांडू, कुआलालंपूर, कुवेत, लागोस, मनामा, मस्कत, रियाध, शारजा, सिंगापूर या देशांमध्ये नीटचे परीक्षा केंद्र होते.
