मुंबई प्रतिनिधी :
दि. २५ जून २०२५
झीनत अमान सोशल मीडियावर सक्रीय असतात आणि त्यांच्या भूतकाळाशी, सिनेमाशी संबंधित किस्से शेअर करतात. झीनत अमान यांनी त्यांच्या ‘सत्यम शिवम सुंदरम’ या सिनेमाबद्दल बऱ्याच वेळा भाष्य केलं आहे. अशातच आता त्यांनी या सिनेमातील गाण्याचा व्हिडिओ शेअर केला असून या गाण्यातील किसिंग सीनचा किस्सा सांगितला आहे. झीनत यांनी सांगितलं की, त्यांना शशी कपूर यांच्यावर त्या शाळेत असल्यापासून क्रश होता.
झीनत अमान यांनी लिहिलं की, ‘चमकणारे डोळे, देखणं रूप असणाऱ्या शशी कपूर यांच्या प्रत्येक शाळकरी मुली प्रेमात असायच्या. मीसुद्धा त्या मुलींमध्ये होते. मी जेव्हा त्यांना पहिल्यांदा पाहिलं तेव्हाही मी बोर्डिंग स्कुलमध्ये होते. शेक्सपिअर नाटक सादर करण्यासाठी ते त्यांच्या होणाऱ्या पत्नीसोबत पाचगणीला आले होते! आणि त्यांना पाहून सगळ्याच मुली भारावून गेल्या.’
‘माझ्या नशिबानं, शशी दक्षिण मुंबईचे रहिवासे होते आणि माझ्यापासून फार दूर राहात नव्हते. शेजारी म्हणायचे की, संध्याकाळी ६ वाजता शशी कपूर यांना फिरण्याची सवय होती. मी आणि माझ्या मैत्रिणी संपूर्ण हिवाळ्याच्या सुट्टीमध्ये घरच्यांना हे पटवून द्यायचो की, संध्याकाळची हवा किती चांगली असते. कारण आम्हाला शॉर्ट्समध्ये फिरायला येणाऱ्या शशी कपूर यांना बघायला जायचं असायचं. जेव्हा शशी आणि मी एकमेकांना भेटलो तेव्हा मला जाणवलं की ते हुशार, आकर्षक आणि एक चांगला माणूस आहेत. आम्ही रोटी, कपडा और मकान, चोरी मेरा काम आणि वकील बाबू सारख्या अनेक गाजलेल्या चित्रपटांमध्ये एकत्र काम केलं.’ असं झीनत यांनी पुढे म्हटलंय.
सत्यम शिवम सुंदरम सिनेमाबद्दल सांगताना झीनत अमान म्हणाल्या की, ‘मला माहित आहे की, मी ‘सत्यम शिवम सुंदरम’ बद्दल आधीच बरंच काही कव्हर केलं आहे. पण मला ही क्लिप तुमच्यासोबत शेअर करावीशी वाटली कारण दोन कारणांमुळे. पहिलं म्हणजे, माझ्या कारकिर्दीतील हा एक मोठा क्षण होता. हा माझा पहिला ऑनस्क्रीन किसिंग सीन होता, जरी त्यामुळे त्यावेळी गोंधळ निर्माण झाला होता, पण प्रत्यक्षात त्यामध्ये प्युरिटी होती. त्याचं शूटिंग करताना मला क्षणभरही अस्वस्थ वाटलं नाही. दुसरं कारण म्हणजे झीनतचं शाळेतील प्रेम सेल्युलॉइडवर प्रत्यक्षात येऊ शकतं अशी पोस्ट करण्याची हिंमत मिळाल्यानं खूप आनंद झाला आहे. शशी कपूर अद्भुत माणूस होता आणि आमच्या परिसरातील पृथ्वी थिएटरच्या रूपात त्याचा वारसा जिवंत आणि भरभराटीला येत असल्याचं पाहणं खरोखरच खास आहे.’
