मुंबई प्रतिनिधी :
दि. ०२ जुलै २०२५
सोमवारी, अनुपम खेर दिग्दर्शित ‘तन्वी द ग्रेट’ या चित्रपटाचा ट्रेलर प्रदर्शित झाला. चित्रपटाच्या ट्रेलरचं खूप कौतुक होत आहे. अशातच आता अभिनेत्याने आधुनिक काळातील बदलत्या रिलेशनशिपवर आणि अलिकडच्या घटनांवर आपलं मत व्यक्त केलं आहे. काय म्हणाले अनुपम खेर? जाणून घेऊया.
इंडिया टुडेला दिलेल्या मुलाखतीत अनुपम खेर यांनी बदलत्या नातेसंबंधांबद्दल भाष्य केलं. अनुपम खेर म्हणाले की, ‘सर्वत्र विचित्र लोक आहेत. ही फक्त भारताची समस्या नाही, तर विकसित देशांमध्येही अशी विचित्र प्रकरणं आहेत. हे केवळ भारतापुरतं मर्यादित नाही, तर श्रीमंत देशांमध्येही अशा घटना समोर येत आहेत. हा भारतकेंद्रित मुद्दा नाही.’
महिला पतींसाठी धोकादायक?
अनुपम खेर पुढे म्हणाले की, ‘तुम्ही कल्पना करू शकता का की, आजकाल महिला त्यांच्या पतींसाठी धोकादायक असू शकतात आणि गोष्टींची योजना आखू शकतात. मी काही चर्चेचा विषय बनू इच्छित नाही, पण हे खूप भयंकर आहे. गोष्टी इतक्या वेगाने बदलत आहेत आणि कधीकधी ते समजणं कठीण होतंय.’
अनुपम खेर पुढे रिलेशनशिपबद्दल म्हणाले की, ‘कौतुक आणि इच्छा यात फरक आहे. आपल्या सर्वांना कोणीतरी आपलं कौतुक करावं असं वाटत असतं. पण आपल्याला असंही वाटत असतं की, आपल्या इच्छा पूर्ण व्हाव्यात. अडचण अशी आहे की, कधीकधी लोक फक्त तुमचं कौतुक करत असतात, पण तुमच्या इच्छा पूर्ण नाही करत.’
चित्रपट कधी प्रदर्शित होईल?
दरम्यान, अनुपम खेर यांचा ‘तन्वी द ग्रेट’ हा सिनेमा १८ जुलै २०२५ मध्ये प्रदर्शित होणार आहे. या चित्रपटात इयान ग्लेन, जॅकी श्रॉफ आणि एम नासेर यांच्याही भूमिका आहेत. चित्रपटाचं संगीत ऑस्कर विजेते एमएम कीरावानी यांनी दिलं आहे. ‘तन्वी द ग्रेट’ या सिनेमाची निर्मिती अनुपम खेर स्टुडिओने एनएफडीसीच्या सहकार्याने केली आहे. त्याचबरोबर, अनुराग बासू दिग्दर्शित ‘मेट्रो इन दिनो’ या सिनेमातसुद्धा झळकणार आहेत.
