पुणे प्रतिनिधी :
दि. ०९ जुलै २०२५
शहरातील उच्चभ्रू भागांमध्ये स्पा सेंटरच्या आड सुरू असलेल्या देह व्यापार रॅकेटवर पुणे पोलिसांनी मोठी कारवाई केली आहे. परिमंडळ ४ अंतर्गत येणाऱ्या विमानतळ तसेच बाणेर परिसरात दोन स्वतंत्र ठिकाणी टाकलेल्या धाडीत पोलिसांनी एकूण १८ मुलींची सुटका केली आहे. यामध्ये १० हून अधिक परदेशी मुलींचा समावेश असल्याने, हे रॅकेट आंतरराष्ट्रीय पातळीवर चालत असल्याची शक्यता व्यक्त करण्यात येत आहे.
बाणेर येथील एका लक्झरी स्पा सेंटरवर धाड टाकण्यात आली. येथे दोन तरुणींची सुटका करण्यात आली. तपासातून समोर आले आहे की, ग्राहकांकडून ‘थेरपी’च्या नावाखाली हजारो रुपये आकारून त्यांचा वापर देह व्यापारासाठी केला जात होता. या स्पा सेंटरच्या मालकासह व्यवस्थापकावरही गुन्हा दाखल करण्यात आला आहे.
दुसऱ्या कारवाईत विमानतळ भागातील एका नामांकित स्पा सेंटरवर पोलिसांनी छापा टाकला असता, तेथे बेकायदेशीररित्या देह व्यापार सुरू असल्याचे उघडकीस आले. या कारवाईत 16 पीडित महिलांची सुटका करण्यात आली. त्यापैकी 10 महिला परदेशी असून उर्वरित 6 भारतीय आहेत. या प्रकरणात स्पा सेंटरचा मालक, व्यवस्थापक आणि जागा भाड्याने देणाऱ्या व्यक्तीविरोधात गुन्हा दाखल करण्यात आला आहे. पोलिसांच्या माहितीनुसार, संबंधित स्पा सेंटर मसाजच्या नावाखाली वेश्याव्यवसायासाठी वापरले जात होते.
या दोन्ही प्रकरणांमध्ये विमानतळ व बाणेर पोलिस ठाण्यात स्वतंत्र गुन्हे दाखल करण्यात आले असून, संबंधित स्पा सेंटरच्या आर्थिक व्यवहारांची तपासणी सुरू आहे. विशेषतः परदेशी महिलांना भारतात कशा प्रकारे आणले गेले, याबाबत चौकशी सुरू असून आंतरराष्ट्रीय रॅकेटचा छडा लावण्यासाठी पोलिसांची विशेष टीम कार्यरत आहे.
या प्रकारच्या बेकायदेशीर कृत्यांना आळा घालण्यासाठी पुणे पोलिसांनी अशा स्पा सेंटरवर सातत्याने कारवाई सुरू ठेवण्याचा इशारा दिला आहे. नागरिकांनी अशा संशयास्पद ठिकाणांबाबत पोलिसांना तत्काळ माहिती द्यावी, असे आवाहनही करण्यात आले आहे.
