मुंबई प्रतिनिधी :
दि. २६ ऑगस्ट २०२५
बॉलिवूडमधील दमदार अभिनयासाठी ओळखले जाणारे सुनील शेट्टी अलीकडे एका कार्यक्रमात चांगलेच भडकले. त्यांची मिमिक्री करणाऱ्या एका कलाकारावर त्यांनी थेट स्टेजवरच रोष व्यक्त केला आणि त्याचं प्रेक्षकांसमोर literal ‘क्लास’ घेतला. या प्रकाराचा व्हिडीओ सध्या सोशल मीडियावर धुमाकूळ घालत आहे.
कार्यक्रमात चुकलं मिमिक्री आर्टिस्टचं गणित
भोपाळमध्ये झालेल्या एका सांस्कृतिक कार्यक्रमात सुनील शेट्टी प्रमुख पाहुणे म्हणून हजर होते. तिथे एका कलाकाराने स्टेजवर येऊन ‘अण्णा’ची मिमिक्री करायला सुरुवात केली. त्याने शेट्टींच्या प्रसिद्ध डायलॉग्सचा उपयोग करत त्यांची स्टाईल आणि आवाज नक्कल करण्याचा प्रयत्न केला, पण हे पाहताच सुनील शेट्टी संतापले.
“हे काय बालिशपणा आहे?” – सुनील शेट्टींचा थेट सवाल
व्हायरल व्हिडिओमध्ये सुनील शेट्टी मिमिक्री करणाऱ्या व्यक्तीला म्हणताना दिसतात –
“हे भाईसाब… तू कोणते डायलॉग मारतो आहेस? माझ्या आवाजाचा काही संबंधच नाही. मी इतकी वाईट नक्कल कधी पाहिली नाही. जेव्हा सुनील शेट्टी बोलतो, तेव्हा तो मर्दासारखा बोलतो… आणि तू?!”
त्यांनी पुढे स्पष्ट शब्दांत सुनावलं – “मिमिक्री करायची असेल तर दर्जेदार कर. असं फालतूपण नको. तुला अजून खूप शिकायचं आहे.”
माफीनंतरही रोष कायम
कलाकाराने त्यांची माफी मागून समजावण्याचा प्रयत्न केला, पण सुनील थांबले नाहीत. त्यांनी सुनावलं –
“माफी मागतोयस हे ठीक आहे, पण प्रयत्नही नको करूस. फक्त केस बांधल्याने कुणी सुनील शेट्टी होत नाही. तुला अजून खूप लांबचा पल्ला गाठायचा आहे.”
सोशल मीडियावर संमिश्र प्रतिक्रिया
हा व्हिडीओ सोशल मीडियावर तुफान व्हायरल झाला असून अनेक युजर्सनी सुनील शेट्टींच्या वर्तनावर नाराजी व्यक्त केली आहे. काहींनी म्हटलं, “त्याने थेट स्टेजवर असा अपमान करू नये, एकांतात सांगता आलं असतं,” तर काहींनी “धडकन” चित्रपटातील डायलॉग वापरून त्यांच्यावरच टीका केली – “तू कालही वाईट वागलास, आजही वाईट वागलास.”
तरी काही चाहत्यांनी त्यांचा बचाव करत, “मिमिक्री मजेशीर असावी, टिंगलटवाळी नाही,” अशी टिप्पणी केली आहे.
