सोलापूर प्रतिनिधी :
दि. २५ सप्टेंबर २०२५
“ओल्या दुष्काळावर अजित पवारांची ठाम भूमिका; ‘शेतकरी विवंचनेत राहणार नाहीत’ असा दिलासा”
मराठवाड्यातील मुसळधार पावसाने शेतीचे प्रचंड नुकसान केले असून, अनेक जिल्ह्यांमध्ये शेतकरी संकटात सापडले आहेत. या पार्श्वभूमीवर राज्याचे उपमुख्यमंत्री अजित पवार यांनी सोलापूर व धाराशिव जिल्ह्याचा दौरा करून परिस्थितीचा आढावा घेतला. यावेळी त्यांनी ओल्या दुष्काळाबाबतही वक्तव्य केले आहे.
दौऱ्यादरम्यान तमालवाडी टोल नाक्यावर काही शेतकऱ्यांनी थेट अजित पवारांची भेट घेतली. त्यांच्या तक्रारी, अडचणी अत्यंत लक्षपूर्वक ऐकत त्यांनी संबंधित अधिकाऱ्यांना तात्काळ कारवाईचे निर्देश दिले. “शेतकऱ्यांच्या समस्या त्वरीत सोडवणं हीच प्रशासनाची प्राथमिक जबाबदारी आहे. एकही शेतकरी विवंचनेत राहू देणार नाही,” असा ठाम विश्वास अजित पवारांनी व्यक्त केला.
या दौऱ्यात शेतकऱ्यांच्या तोंडी सतत “ओला दुष्काळ जाहीर करा” ही मागणी होती. यावर प्रतिक्रिया देताना अजित पवार म्हणाले, “विरोधकांकडून अशा मागण्या होतातच, आणि आम्हीही विरोधात असताना त्याच मागण्या करत होतो. मात्र सत्तेत असताना निर्णय घेताना नियमांचे बंधन असते. तरीसुद्धा, जर गरज भासली तर नियम बाजूला ठेवून मदत करण्याची तयारी राज्य शासनाची आहे,” असे सांगत त्यांनी ओल्या दुष्काळाची शक्यता नाकारली आहे.
पुढे बोलताना अजित पवार म्हणाले, “मराठवाड्यात जे नुकसान झालं आहे, त्याचा सविस्तर अहवाल तयार करून लवकरच केंद्र सरकारकडे पाठवला जाईल. त्यानंतर केंद्राकडूनही अर्थसाहाय्य मिळवण्यासाठी आम्ही प्रयत्नशील आहोत.”
राज्य सरकारमधील बहुतेक सर्व मंत्री सध्या मराठवाड्याच्या विविध भागांमध्ये पाहणी करत आहेत. शासनाच्या वतीने संपूर्ण प्रशासन यंत्रणा शेतकऱ्यांच्या मदतीसाठी सज्ज असून, “शासन कुठेही कमी पडणार नाही,” अशी ग्वाही अजित पवारांनी माध्यमांशी बोलताना दिली.
शेवटी, “राजकारण बाजूला ठेवून, संकटात सापडलेल्या शेतकऱ्यांच्या मदतीसाठी सर्वांनी एकत्र यावं,” असा स्पष्ट संदेश अजित पवारांनी दिला आहे. ओल्या दुष्काळावर निर्णय अद्याप अनिश्चित असला, तरी शासनाकडून खंबीर आधाराची आश्वासने शेतकऱ्यांसाठी दिलासादायक ठरत आहेत.
