मुंबई प्रतिनिधी :
दि. २५ नोव्हेंबर २०२५
बॉलिवूडचे ज्येष्ठ आणि दिग्गज अभिनेते धर्मेंद्र यांचे २४ नोव्हेंबर २०२५ रोजी निधन झाले. त्यांच्या जाण्याने संपूर्ण चित्रपटसृष्टीत हळहळ व्यक्त होत असून, एक मोठी पोकळी निर्माण झाल्याची भावना सर्वत्र व्यक्त केली जात आहे. ३१ ऑक्टोबरला श्वसनासंबंधी त्रास जाणवल्यानंतर त्यांना रुग्णालयात दाखल करण्यात आले होते. प्रकृती गंभीर असली तरी नंतर त्यांना डिस्चार्ज देण्यात आला आणि देओल कुटुंबाने त्यांच्यावर घरीच उपचार चालू ठेवण्याचा निर्णय घेतला. मात्र काल त्यांच्या जीवनप्रवासाचा शेवट झाला.
धर्मेंद्र यांनी १९६५ मध्ये अभिनयाला सुरुवात केली आणि ७०–८० च्या दशकात त्यांनी बॉलिवूडवर अधिराज्य गाजवले. त्यांच्या उल्लेखनीय कामगिरीसाठी भारत सरकारने त्यांना पद्मभूषण प्रदान केला होता. साधारणतः अशा उच्च नागरी सन्मानप्राप्त व्यक्तींच्या निधनानंतर त्यांना शासकीय आदरांजली दिली जाते. परंतु धर्मेंद्र यांच्या बाबतीत तसे झाले नाही, हे पाहून अनेक चाहत्यांना आश्चर्य वाटले.
मग त्यांना शासकीय इतमाम का मिळाला नाही?
यामागचे कारण आता स्पष्ट झाले आहे. सूत्रांनी दिलेल्या माहितीनुसार, धर्मेंद्र यांच्या निधनाची माहिती प्रशासनापर्यंत उशिरा पोहोचली. शासकीय इतमामात अंत्यसंस्कार करायचे असल्यास कुटुंबीयांकडून सरकारला प्रस्ताव सादर करावा लागतो आणि त्यानंतर मंजुरी देण्याची एक संपूर्ण कायदेशीर प्रक्रिया असते. ही प्रक्रिया वेळखाऊ असते.
परंतु देओल कुटुंबाने शासकीय इतमामात अंत्यसंस्कार करण्याची इच्छा व्यक्त केली नव्हती. याशिवाय, त्यांच्या निधनाची बातमी माध्यमांमध्येही उशिराने आली आणि अंत्यसंस्कार देखील अत्यंत घाईघाईत पार पडले. त्यामुळे शासकीय पद्धतीने मानवंदना देणे शक्य झाले नाही.
या कारणांमुळे पद्मभूषण धर्मेंद्र यांना सरकारी इतमामात अखेरचा निरोप देण्यात आला नाही.
