मुंबई प्रतिनिधी :
दि. २६ नोव्हेंबर २०२५
खरा मित्र कोण म्हणावा, तर तो सूर्यकुमार यादवसारखा—हे पुन्हा एकदा सिद्ध झाले आहे. रोहित शर्माचे जे स्वप्न अपूर्ण राहिले होते, ते पूर्ण करण्याची तयारी सूर्यकुमारने जगासमोर घोषित केली आहे. टी२० वर्ल्ड कप २०२५ चे वेळापत्रक आज जाहीर झाले आणि त्यावेळी सूर्याने दिलेल्या वक्तव्यामुळे चाहत्यांच्या हृदयात उत्सुकता आणि आनंद दोन्ही वाढले आहेत.
रोहित शर्मा आणि सूर्यकुमार यादव यांच्यातील मैत्री सर्वज्ञात आहे. भारतीय टी२० संघाचे नेतृत्व करताना रोहितने सूर्याला नेहमी विशेष मान दिला. २०२४ च्या टी२० वर्ल्ड कप जिंकण्यात सूर्यकुमारने निर्णायक भूमिका बजावली — विशेषतः फायनलमधील अविश्वसनीय कॅचमुळे भारताने सामना आपल्या बाजूने खेचला. मात्र याच विजयानंतर रोहितने अचानक निवृत्तीची घोषणा करून सर्वांना आश्चर्याचा धक्का दिला. त्यानंतर संघाचा नवा कर्णधार कोण असेल, यावर चर्चा रंगली. शेवटी हार्दिक पंड्यापेक्षा वरचढ ठरून सूर्यकुमार यादवला नेतृत्वाची धुरा सोपवण्यात आली.
आज वर्ल्ड कपचे वेळापत्रक जाहीर करताना रोहित शर्माची स्पर्धेच्या ब्रँड अॅम्बेसेडरपदी निवड झाली. रोहित उपस्थित असताना सूर्यकुमारला विचारले गेले की, भारत अंतिम फेरीत गेला तर त्याला कोणत्या संघाशी भिडायला आवडेल? सूर्याच्या उत्तराने सर्वांचे लक्ष वेधले. तो म्हणाला,
“अहमदाबादच्या नरेंद्र मोदी स्टेडियममध्ये भारत–ऑस्ट्रेलिया फायनल व्हावी, अशी माझी इच्छा आहे.”
हे बोलताना सूर्याने स्पष्टपणे सूचित केले की तो रोहितचे अधुरे स्वप्न पूर्ण करण्यास सज्ज आहे. कारण याच मैदानावर २०२३ च्या वनडे वर्ल्ड कपची फायनल झाली होती. रोहित कर्णधार होता आणि त्यावेळी त्याने ऑस्ट्रेलियावर मात करून ट्रॉफी उचलण्याचे ध्येय ठेवले होते, पण ते स्वप्न पूर्ण झाले नाही. आता त्याच ठिकाणी, त्याच प्रतिस्पर्ध्याविरुद्ध विजय मिळवून रोहितच्या मनातील अपूर्ण अध्याय पूर्ण करायचा आहे, असा सूर्यााचा आशय होता.
रोहित शर्माच्या नेतृत्वात भारताने मागील टी२० वर्ल्ड कप जिंकला होता. आता सूर्यकुमार यादवच्या नेतृत्त्वाखाली टीम इंडिया पुन्हा जागतिक विजेतेपद मिळवणार का, याची उत्सुकता क्रिकेटप्रेमी प्रत्येकजण बाळगत आहे.
