बुलढाणा प्रतिनिधी :
दि. २७ नोव्हेंबर २०२५
बुलढाण्यात आयोजित सभेत उपमुख्यमंत्री एकनाथ शिंदे यांनी जोरदार भाषण करत विरोधकांना थेट इशारा दिला. “मी एकदा काही ठरवलं, तर मग स्वतःचंही ऐकत नाही. शिवसेना पराभूत करणं अवघडच नव्हे तर अशक्य आहे. मी ‘शोले’मधल्या असरानीसारखा ‘आधे इधर जाओ, आधे उधर जाओ’ म्हणणारा नाही. माझ्या मागे आणि पुढे खूप मोठी ताकद उभी आहे”, अशा शब्दांत त्यांनी विरोधकांवर निशाणा साधला. त्यांच्या या वक्तव्याचा नेमका बाण कोणाकडे होता, यावरून राजकीय वर्तुळात चर्चा रंगल्या आहेत.
या कार्यक्रमाला केंद्रीय राज्यमंत्री प्रतापराव जाधव, आमदार संजय गायकवाड, आमदार अब्दुल सत्तार, जिल्हाप्रमुख ओमसिंग राजपूत, तसेच उमेदवार पूजा गायकवाड उपस्थित होते.
“लाडकी बहिण योजना कोणीही बंद करू शकत नाही”
शिंदे पुढे म्हणाले, “कोणीही मायचा लाल आला तरी लाडकी बहिण योजना थांबणार नाही, हा माझा शब्द. काही लोक असत्य बोलून गोंधळ माजवत आहेत, पण त्याकडे दुर्लक्ष करा. आरोप, टीका करणं हा आमचा व्यवसाय नाही. आमचं ध्येय एकच—विकास! त्यासाठी नगरविकास विभागातून आवश्यक निधी मी दिला आहे आणि देत राहीन.”
ते पुढे म्हणाले की ते फक्त प्रचारासाठी नाही, तर जनता भेटण्यासाठी येथे आले आहेत.
“मुख्यमंत्री झाल्यापासून ही बुलढाण्यातली माझी सहावी भेट आहे. तुम्ही मागाल ते दिलं. आता तुमच्याकडूनही अपेक्षा आहे—विधानसभेत जसा भरघोस विजय दिला, तसाच नगरपालिकेतही भगवा फडकवायचा आहे.”
त्यांनी सांगितले की, एवढ्या मोठ्या संख्येने उपस्थिती बघता निवडणुकीतही लोक ठाम उभे राहिले तर विरोधकांचे डिपॉझिट जप्त होईल. “शिवसेनेला मत म्हणजे विकासाला मत,” असेही ते म्हणाले आणि पक्षाचा किल्ला कायम राखण्याचे आवाहन केले.
“मंत्र दिला आणि संजय गायकवाड बदलला”
आमदार संजय गायकवाड यांच्याबद्दल बोलताना शिंदे म्हणाले,
“संजय कधी कधी कामाच्या गडबडीत चूक करतो, पण त्यामागची भावना सामान्यांना न्याय मिळावा हीच असते. मी त्याला काही मार्गदर्शन केलं आणि तो आता सुधारला आहे. तो बाळासाहेबांचा खरा शिवसैनिक आहे.”
शिंदे पुढे म्हणाले,
“संजय, रोज एखाद्या महापुरुषाच्या पुतळ्यासमोर दोन मिनिटं शांत उभा रहा आणि त्यांचा इतिहास मनात आण. मग तुला कधीही मागे वळून पाहावं लागणार नाही.”
