मुंबई प्रतिनिधी :
दि. २९ नोव्हेंबर २०२५
स्मृती मानधनाचं लग्न अगदी काही तासांवर आलेलं असतानाच तिच्या वडिलांना, श्रीनिवासन यांना हृदयविकाराचा झटका आला. या अचानक झालेल्या घटनेमुळे स्मृती–पलाश यांचा विवाह अनिश्चित काळासाठी रद्द करण्यात आला. या दोघांचा विवाह कधी होणार याबद्दल अद्याप काही ठोस माहिती नाही. पण स्मृती मैदानात कधी दिसणार, याची तारीख मात्र आता स्पष्ट झाली आहे.
महिलांच्या वर्ल्ड कपमध्ये भारतासाठी सर्वाधिक धावा करणाऱ्या स्मृतीने विजेतेपदात मोठा वाटा उचलला होता. भारताने पहिल्यांदाच महिला विश्वचषक जिंकल्याने तिच्या कामगिरीने पुन्हा एकदा प्रकाशझोत तिच्यावर केंद्रित केला. विजयानंतर पलाश मैदानातच स्मृतीला भेटला आणि दोघांनी सेलिब्रेशनही केलं. याच डी. वाय. पाटील स्टेडियमवर पलाशने स्मृतीला प्रपोज केल्यामुळे हे मैदान तिच्यासाठी खास आठवणींचं ठिकाण ठरलं.
मात्र वडिलांची अचानक बिघडलेली प्रकृती पाहता लग्न पुढे ढकलावे लागले. तरीही स्मृती मैदानात पुनरागमन करणार असल्याची निश्चित तारीख समोर आली आहे.
आताच्या परिस्थितीत क्रिकेटच तिच्यासाठी उत्तम मानसिक आधार ठरू शकतो आणि ती लवकरच भारतीय संघात परतणार आहे, अशी माहिती प्राप्त झाली आहे. वर्ल्ड कपनंतर आता भारताचा महिला संघ श्रीलंकेविरुद्ध टी–२० मालिकेत उतरणार आहे. भारतातील या दौऱ्यात पाच सामन्यांची मालिका खेळवली जाणार असून, पहिला सामना २१ डिसेंबरला होईल. पहिले दोन सामने विशाखापट्टणममध्ये तर उर्वरित तीन सामने तिरुवनंतपुरम येथे होणार आहेत.
त्यामुळे स्मृती २१ डिसेंबरला पुन्हा मैदानात उतरू शकते, असे संकेत आहेत. सध्या तरी मालिकेपूर्वी स्मृती लग्न करेल, अशी कोणतीच चिन्हे नाहीत. त्यामुळे क्रिकेट प्रेमींना ती प्रथम क्रिकेटच्या मैदानातच भेटणार आहे.
