मुंबई प्रतिनिधी :
दि. ०९ डिसेंबर २०२५
ज्येष्ठ अभिनेते धर्मेंद्र यांच्या निधनानंतर त्यांची तब्बल ४५० कोटी रुपयांची मालमत्ता कोणामध्ये विभागली जाणार, याची चर्चा बॉलिवूडपासून चाहत्यांपर्यंत सर्वत्र रंगली आहे. दोन विवाह आणि सहा मुलं असल्यामुळे संपत्तीवर कोणाचा नेमका हक्क आहे, हा प्रश्न अधिक गुंतागुंतीचा झाला आहे. पहिल्या पत्नी प्रकाश कौर यांच्यापासून सनी, बॉबी, अजिता आणि विजेता ही चार मुलं तर दुसऱ्या पत्नी हेमा मालिनीपासून ईशा आणि अहाना या दोन मुली—अशी धर्मेंद्र यांची मोठी कुटुंब रचना आहे.
कायद्याच्या दृष्टीने या सर्व मुलांच्या हक्काबाबत 2023 मधील सर्वोच्च न्यायालयाचा रेवणसिद्धप्पा विरुद्ध मल्लिकार्जुन या प्रकरणातील निकाल अत्यंत निर्णायक ठरतो. या निर्णयानुसार, पहिली पत्नी जिवंत असताना केलेले दुसरे लग्न हिंदू विवाह कायद्याखाली अवैध ठरते, त्यामुळे धर्मेंद्र आणि हेमा मालिनी यांचे लग्न कायदेशीरदृष्ट्या मान्य मानले जात नाही. मात्र, या नात्यातून जन्मलेल्या मुलांचे हक्क अबाधित राहतात. कलम 16(1) अंतर्गत, अशा मुलांना त्यांच्या पालकांच्या स्व-अर्जित आणि वडिलोपार्जित मालमत्तेवर पूर्ण अधिकार मिळतो. याचा अर्थ असा की धर्मेंद्र यांच्या सर्व सहा मुलांना संपत्तीवर समान हक्क आहे आणि ईशा व अहाना यांचे अधिकार सनी–बॉबीइतकेच वैध आहेत.
दुसरीकडे, हेमा मालिनी यांच्या हिस्स्याबाबत परिस्थिती पूर्णपणे वेगळी आहे. कारण लग्न कायदेशीरदृष्ट्या अवैध ठरल्यानं त्यांना धर्मेंद्र यांच्या संपत्तीवर थेट हक्क मिळत नाही. त्यांना हिस्सा मिळू शकतो तो फक्त दोन मार्गांनी—एकतर धर्मेंद्र यांनी मृत्युपत्रात त्यांच्यासाठी काही हिस्सा राखून ठेवला असल्यास किंवा त्यांच्या विवाहाची वैधता न्यायालयात सिद्ध झाल्यास. सध्याच्या माहितीनुसार या दोन्ही गोष्टींची अधिकृत पुष्टी उपलब्ध नाही.
धर्मेंद्र यांच्या मालमत्तेत मुंबईतील आलिशान बंगला, खंडाळा आणि लोणावळ्यातील फार्महाऊसेस, विविध रिअल इस्टेट गुंतवणुकी, “गरम धरम” ही लोकप्रिय रेस्टॉरंट चेन तसेच लक्झरी कार्सचा मोठा संग्रह यांचा समावेश आहे. याशिवाय ब्रँड एंडोर्समेंट्स आणि गुंतवणुकीतूनही त्यांनी मोठी संपत्ती जमा केली होती.
संपत्तीचे विभाजन कसे होईल हे पाहणे आता औत्सुक्याचे ठरले आहे. कायद्यानुसार सर्व मुलांना समान हिस्सा मिळण्याची तरतूद असली तरी प्रत्यक्ष विभागणी कुटुंबातील परस्पर सहमती, धर्मेंद्र यांच्या वसीयतपत्र आणि कुटुंबातील संबंधांवर अवलंबून राहील. मात्र एक गोष्ट निश्चित—धर्मेंद्र यांच्या निधनानंतरही त्यांच्याभोवतीची चर्चेची वलये तितकीच विस्तारत आहेत आणि त्यांच्या मोठ्या कुटुंबातील वारसाहक्काचा हा प्रश्न काही काळ तरी चर्चेत राहणार आहे.
