मुंबई प्रतिनिधी :
दि. १६ जानेवारी २०२६
मुंबई महापालिका निवडणुकांच्या मतमोजणीला आज सकाळी दहा वाजता सुरुवात झाली असून सुरुवातीच्या कलांमध्ये सत्तेसाठी जोरदार चुरस पाहायला मिळत आहे. पहिल्या अर्ध्या तासात भारतीय जनता पक्षाने आघाडी घेतली असून भाजप ११ जागांवर पुढे आहे. उपमुख्यमंत्री एकनाथ शिंदे यांच्या नेतृत्वाखालील शिवसेना १० जागांवर आघाडीवर आहे. त्यामुळे महायुतीला एकूण २१ जागांवर सुरुवातीची आघाडी मिळाल्याचे चित्र आहे.
दुसरीकडे, ठाकरे बंधूंनी देखील महायुतीला कडवी टक्कर दिली आहे. शिवसेना (उद्धव बाळासाहेब ठाकरे) पक्ष १४ जागांवर आघाडीवर असून महाराष्ट्र नवनिर्माण सेना ६ जागांवर पुढे आहे. त्यामुळे ठाकरे बंधूंच्या युतीला एकूण २० जागांवर आघाडी मिळाल्याचे सुरुवातीच्या कलांवरून स्पष्ट होत आहे. काँग्रेसनेही ५ जागांवर खाते उघडत आपली उपस्थिती दाखवून दिली आहे.
मुंबई महापालिकेची निवडणूक : राज्याचे लक्ष निकालाकडे
गुरुवारी पार पडलेल्या मतदानानंतर आज होणाऱ्या निकालाकडे केवळ मुंबईच नव्हे, तर संपूर्ण राज्याचे लक्ष लागून राहिले आहे. मुंबई महापालिकेच्या एकूण २२७ प्रभागांमध्ये सुमारे १ हजार ७०० उमेदवारांचे राजकीय भवितव्य मतपेटीत बंद झाले आहे.
मतदानाची टक्केवारी हळूहळू वाढली; संध्याकाळपर्यंत केंद्रांवर रांगा
गुरुवारी सकाळी साडेनऊ वाजेपर्यंत केवळ ६.९८ टक्के मतदान झाले होते. सकाळी साडेअकरा वाजेपर्यंत ही टक्केवारी १७.७३ टक्क्यांपर्यंत पोहोचली. दुपारी साडेतीन वाजेपर्यंत मतदान ४१ टक्क्यांपर्यंत वाढले. सायंकाळी साडेपाच वाजेपर्यंत मतदार मतदान केंद्रांवर दाखल होत होते. अनेक ठिकाणी रांगा लागल्याने साडेपाचनंतरही आतमध्ये मतदान सुरू होते.
एग्झिट पोलचा अंदाज : महायुतीकडे सत्तेची चावी?
दरम्यान, एग्झिट पोलच्या अंदाजानुसार मुंबईत ठाकरे बंधूंच्या युतीचे आव्हान मोडून काढत भाजप–शिवसेना महायुती सत्तेच्या दिशेने वाटचाल करत असल्याचे संकेत आहेत. ‘अॅक्सिस माय इंडिया’च्या एग्झिट पोलनुसार, मुंबई महापालिकेच्या २२७ जागांपैकी महायुतीला १३१ ते १५१ जागा मिळण्याची शक्यता वर्तवण्यात आली आहे.
ठाकरे बंधूंच्या युतीला मर्यादित यश, काँग्रेस-वंचित व इतरांचाही प्रभाव
एग्झिट पोलनुसार, ठाकरे बंधूंच्या युतीला ५८ ते ६८ जागांवर समाधान मानावे लागण्याची चिन्हे आहेत. काँग्रेस-वंचित आघाडीला १२ ते १६, तर इतर पक्षांना ६ ते १२ जागा मिळू शकतात, असा अंदाज वर्तवण्यात आला आहे.
निकालाकडे उत्सुकता शिगेला; मुंबईचा कारभार कोणाच्या हाती?
सुरुवातीचे कल, एग्झिट पोलचे अंदाज आणि मतमोजणीतील चढ-उतार पाहता मुंबई महापालिकेची सत्ता कोणाच्या हाती जाणार, याबाबत उत्सुकता शिगेला पोहोचली आहे. अंतिम निकालात कोण बाजी मारणार, हे पाहणे औत्सुक्याचे ठरणार आहे.
