बारामती प्रतिनिधी :
दि. २८ जानेवारी २०२६
अजितदादा पवार ज्या विमानातून प्रवास करत होते, ते VSR कंपनीचं असल्याची माहिती समोर आली आहे. बारामती परिसरातील शेतात हे विमान कोसळल्यानंतर स्थानिकांना मोठा स्फोटाचा आवाज ऐकू आला. अपघातानंतर विमानाला भीषण आग लागली आणि त्यानंतर सलग चार ते पाच स्फोट झाल्याचंही प्रत्यक्षदर्शींनी सांगितलं आहे. आगीचा भडका इतका प्रचंड होता की ती तात्काळ विझवणं अशक्य ठरलं.
विमान कोसळल्याचं लक्षात येताच स्थानिक नागरिक घटनास्थळी धावले. त्यांनी मदतकार्य सुरू करत मृतदेह बाहेर काढण्याचा प्रयत्न केला. या भीषण अपघातात अजित पवार यांच्यासह विमानातील इतर प्रवाशांचाही मृत्यू झाल्याची माहिती आहे. या घटनेनंतर संपूर्ण राज्यात शोककळा पसरली आहे.
स्थानिकांनी दिलेल्या माहितीनुसार, अजित पवार यांची ओळख त्यांच्या हातातील घड्याळ, त्यांनी वापरलेला गॉगल आणि अंगावरील जॅकेटवरून पटली. मृतदेह झाकण्यासाठी नागरिकांनी घरातील ब्लँकेट्स आणि कपडे पोलिस व मदतकार्य करणाऱ्यांना दिले. त्यानंतर सर्व मृतदेह रुग्णवाहिकेत हलवण्यात आले.
प्राथमिक माहितीनुसार, बारामती विमानतळावर उतरण्याचा प्रयत्न सुरू असताना हे विमान शेतात कोसळलं आणि लगेचच आग लागली. नागरी विमान वाहतूक महासंचालनालयाने (DGCA) या अपघाताची माहिती दिली आहे.
एका प्रत्यक्षदर्शी नागरिकाने सांगितलं की, “स्फोटाचा मोठा आवाज झाल्यानंतर आम्ही घटनास्थळी पोहोचलो. विमान पेटलेलं होतं आणि त्यानंतर पुन्हा चार-पाच स्फोट झाले. काही वेळातच मोठी गर्दी जमली. या दुर्घटनेत अजितदादांचं निधन झाल्याचं कळलं.”
