सांगोला प्रतिनिधी : डीडी न्युज मराठी
दि. १५ ऑगस्ट २०२१
अकोला वासुद हे सांगोला तालुक्यातील एक महत्वपुर्ण गाव होय. अनेक गोष्टींमध्ये हे गाव सदैव पुढाकार घेऊन काही उपक्रम साकारत असते. वृक्षारोपणा संदर्भात असाच एक आगळावेगळा व नाविन्यपुर्ण उपक्रम येथील युवकांनी ग्रामस्थांच्या मदतीने साकारला आहे. ‘ग्रामविकास फाऊंडेशन’तर्फे ‘माझे गाव, माझे झाड’ अभियाना अंतर्गत गावामध्ये २१ शे रोपांचे वृक्षारोपण करण्यात आले आहे.
नोकरी, उद्योगधंद्याच्या निमित्ताने बाहेरगावी असलेल्या युवकांनी मिळून हा उपक्रम गावात राबविला आहे. कोणी प्रशासकीय अधिकारी, कोणी डॉक्टर, कोणी व्यवसायिक तर कोणी प्राध्यापक अशा विविध क्षेत्रातील गावाविषयी प्रेम आणि आस्था असणारे युवक आहेत. या युवकांनी मिळून गावाच्या सर्वांगिण हिताकरिता सर्वात आधी ‘ग्रामविकास फाऊंडेशन’ सुरु केले.
या फाऊंडेशनच्या माध्यमातून गावात पहिला उपक्रम हाती घेतला तो म्हणजे, गावातील सर्व प्रमुख रस्त्यांवर वृक्षारोपण करणे. ‘माझे गाव, माझे झाड’ ही टॅगलाईन देऊन फाऊंडेशनने पहिल्या टप्यात तब्बल २१ शे रोपांचे वृक्षारोपण करण्याचे ठरविले. त्यासाठी या सर्व युवकांनी एकत्रित येऊन स्वतः आर्थिक मदत गोळा केली. त्यानंतर गावातील नागरिकांच्या मदतीने आणखी निधी उभा केला. युवकांचा उत्साह आणि काम करण्याची तळमळ पाहून जवळपास लाखो रुपयेंचा निधी उभा राहिला. त्यातून मग, २१ शे रोपे खरेदी केली. विशेष म्हणजे, ही सर्व रोपे देशी आहेत. ज्यामध्ये चिंच, आंबा, शिसव, अर्जुन, अंजन, कांचन, आवळा, करंज, पिंपळ, कडुनिंब, काशिद, शिताफळ, गुलमोहर, वड, जांभुळ व उंबर या देशी वृक्षांचा समावेश आहे. शिवाय, ही लावण्यात आलेली रोपे खराब होऊ नयेत किंवा जनावरांपसून त्याचे संरक्षण व्हावे म्हणून प्रत्येक रोपास खास ट्रिगार्ड बनविण्यात आली आहेत.
या उपक्रमामध्ये गावातील नागरिकांचा फार मोठ्या प्रमाणावर सहभाग घेतला आहे. प्रत्येक नागरिक व विद्यार्थ्यांना झाडांचे पालकत्व देण्यात आले. त्यामूळे त्या झाडाची जबाबदारी त्या त्या व्यक्तींवर असणार आहे. या उपक्रमास गावातील लोकांनी पैशाच्या स्वरूपात, जेसीबी, ट्रॅक्टर आणि खते यांच्या स्वरूपात भरीव मदत केली. या अभिनव उपक्रमाचे समाजातील सर्व स्तरातून जोरदार कौतूक होत आहे.
अकोला गावचे सुपुत्र व ठाणे येथे तहसीलदार पदावर कार्यरत असलेले आकाश लिगाडे यांनी या उपक्रमासंदर्भात सविस्तर माहिती दिली आहे.