मुंबई प्रतिनिधी :
दि. ०३ एप्रिल २०२४
लोकसभा निवडणुका काही दिवसांवर येऊन ठेपल्या असल्या तरी महाविकास आघाडीत जागावाटपाचा तिढा अजून ‘जैसे थे’च आहे. जागावाटपावरून आघाडीतील नेत्यांमध्ये मतभेद
असल्याचं दिसून येत आहे. तर सांगली आणि भिंवडीच्या जागेवरून आघाडीतील मित्रपक्ष एकमेकांविरुद्ध उभे ठाकले आहेत. ठाकरे गटाने चर्चा न करता सांगलीतील आपला
उमेदवार जाहीर केला असा आरोप काँग्रेसने केला आहे, तर सांगलीची जागा आपलीच असल्याचा दावा शिवसेनेकडून केला गेला आहे. त्यामुळे मविआमध्ये अद्यापही
जागावाटपावरून धुसफूस सुरू असल्याचं चित्र आहे. म्हणूनच, आघाडीतील जागावाटपाच्या या कुरबुरीवर बोलताना भाजपचे वरिष्ठ नेते गिरीश महाजन म्हणाले, “महाविकास
आघाडी आज तुटेल की उद्या, अशी परिस्थिती निर्माण झाली आहे!”
सध्या राज्यातील विविध मतदारसंघांत कोणता उमेदवार द्यायचा यावरून राजकीय पक्षांमध्ये बोलणी सुरू आहेत. मात्र, काही जागांसाठी मित्रपक्षांमध्ये वाद सुरू असल्याचंही दिसतं
आहे. मग आघाडीत सांगली भिवंडीवरून तर नाशिकच्या जागेवरून महायुतीमध्ये धुसफूस सुरू आहे. मात्र, युतीमधील वाद हे हाताळण्याजोगे असून आघाडीमधील मतभेद गंभीर
आहेत असे संगत जागावाटपारून आघाडीतील नेत्यांमध्ये रोज वाद सुरू असल्याचं वक्तव्य गिरीश महाजन यांनी केलं आहे.
महाजन म्हणाले, “वास्तविक शिवसेना आणि राष्ट्रवादी आमच्याकडे आलेली आहे. पाच-सात लोक शरद पवारांकडे तर पाच-सात आमदार उद्धव ठाकरेंकडे उरलेले आहेत. ही जागा
मला मिळाली पाहिजे, ती जागा आमचीच आहे यावरून महाविकास आघाडीतील नेत्यांमध्ये रोज वाद सुरू आहेत, त्यांच्यात रोज भांडणं सुरू आहेत. त्यांची युती आज तुटेल की उद्या,
अशी परिस्थिती आहे. महाविकास आघाडीचं राज्यात काही खरं दिसत नाही, त्यामुळे या देशात तसेच राज्यात अनुकूल परिस्थिती ही भाजपला आहे.” महाजन यांच्या या वक्तव्यामुळे
आघाडीत खरंच बिघाडी होणार की काय? अश्या चर्चांनी जोर धरला आहे.
