मुंबई प्रतिनिधी :
दि. १६ एप्रिल २०२४
अभिनेता शाहरुख खान ‘पठाण’, ‘जवान’ आणि ‘डंकी’ या सिनेमांनंतर ‘किंग’ या सिनेमातून पुन्हा एकदा एका वेगळ्या भूमिकेतून प्रेक्षकांच्या भेटीस येणार आहे. सुजॉय घोष २०२५ मध्ये रिलीज होणाऱ्या या सिनेमाचं दिग्दर्शन करत आहेत. शाहरुखची लेक सुहानासुद्धा या सिनेमातून मोठ्या स्क्रीनवर पदार्पण करतेय. हा सिनेमा उत्तम बनावा म्हणून सिनेमाची टीम जोरदार तयारी करत आहे. सध्या या सिनेमाच्या शूटिंगची पूर्वतयारी सुरु आहे.
तब्बल २०० करोड रुपये बजेट असलेला हा चित्रपट अॅक्शन आणि ड्रामाने परिपूर्ण आहे. या सिनेमाची निर्मिती सिद्धार्थ आनंद आणि रेड चिलीज एंटरटेनमेंट करत आहेत. हा सिनेमा अॅक्शनने पुरेपूर भरलेला असून इंडस्ट्रीत अॅक्शनपटांसाठी एक वेगळं उदाहरण या सिनेमातून तयार होणार आहे असं’बॉलिवूड हंगामा’ चा रिपोर्टम्हणतो. सुहाना खान या सिनेमातून पदार्पण करणार असल्याने ही फिल्म भव्य आणि तितकीच उत्तम व्हावी असा प्रयत्न सिनेमाच्या टीमकडून करण्यात येतोय. सध्या, लेकीच्या मोठ्या स्क्रीनवरील पदार्पणासाठी शाहरुख खूप जास्त मेहनत घेत असल्याची चर्चा सगळीकडे रंगली आहे.
उत्तम व्हीएफएक्स आणि आधुनिक तंत्रज्ञान या सिनेमासाठी वापरलं जाणार असून खास परदेशातील स्टंट दिग्दर्शक या सिनेमासाठी बोलावले असल्याची माहिती मिळते आहे. सिनेमाच्या शूटिंगला येत्या मे महिन्यात सुरुवात होणार असून पाच महिने या सिनेमाचं शूटिंग सुरु राहणार आहे. प्रेक्षकांच्या भेटीस हा सिनेमा २०२५ च्या अखेरीस येईल असा अंदाज आहे.
दरम्यान, शाहरुख किंवा सुहानाने कोणतीही पोस्ट या सिनेमाबाबत शेअर केली नाहीये. तसेच याबाबत सिनेमाच्या टीमकडून सुद्धा कोणतीही माहिती देण्यात आली नाहीये.
झोया अख्तर दिग्दर्शित ‘आर्चिज’ या सिनेमातून सुहानाने अभिनयक्षेत्रात पदार्पण केलं. ख़ुशी कपूर, अगस्त्य नंदा यांचीही मुख्य भूमिका ओटीटीवर रिलीज झालेल्या या सिनेमात होती. प्रेक्षकांचा संमिश्र प्रतिसाद या सिनेमाला मिळाला. या सिनेमावर टीकासुद्धा काहींनी केली होती. प्रेक्षकांचं मन जिंकण्यात पहिल्या सिनेमातून अयशस्वी ठरल्यानंतर सुहानाचा हा सिनेमा यशस्वी ठरणार का? याकडे सगळ्यांचं लक्ष लागून राहिलंय.