पुणे प्रतिनिधी :
दि. १८ एप्रिल २०२४
आज उद्धव ठाकरे यांच्या शिवसेनेतील कुलदीप कोंडे यांनाविजय शिवतारे यांनी शिंदेंच्या शिवसेनेत आणले. याचा आनंद व्यक्त करत अजित पवारांनी त्यांचे कौतुकही केले.
आज पुण्यात बारामती लोकसभा मतदारसंघातील महायुतीच्या उमेदवार सुनेत्रा पवार यांच्यासाठी सभा झाली. त्यांचा उमेदवारी अर्ज आज दाखल करण्यात येणार आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार त्यासाठी एकाच व्यासपीठावर आहेत. यावेळी शिंदेंच्या सेनेत शिवसेना उध्दव ठाकरे पक्षाचे जिल्हा संघटक कुलदीप कोंडे देशमुख यांनी प्रवेश केला.
शिवसेनेचे नेते विजय शिवतारे हे अजित पवारांचे भाषण सुरू असतानाच कुलदीप कोंडेंना व्यासपीठावर घेऊन आले. जे लाखाने मतं घेतात ते कुलदीप कोंडे देशमुख यांनी आज शिवसेनेत प्रवेश केला आहे असे, ते उध्दव ठाकरेंच्या पक्षातून शिंदेच्या सेनेत येत असल्याचे समजताच अजितदादा म्हणाले. भोर, वेल्हा, मुळशीमध्ये त्यांची किती ताकद आहे, हे सगळे जाणून आहेत. विजय शिवतारेंनी ही किमया केली आहे, त्याबद्दल त्यांनाही धन्यवाद.
विरोधक कसा असावा लागतो, हे शिवतारेंकडे बघून शिका. विजयबापूंकडे बघून, मित्रही कसा असावा लागतो, तेही शिका. पडेल ती किंमत मोजावी लागली तरी चालेल पण एकदा मैत्री केली की, मैत्रीला अंतर पडू देत नाही. विजय शिवतारेंचे काम अशापध्दतीचे असल्याचे कौतुक अजित पवारांनी केले.
बारामती लोकसभा मतदारसंघातून शिवतारे यांनी उमेदवारीची घोषणा केली होती. पण नंतर माघार घेत त्यांनी सुनेत्रा पवारांसाठी प्रचार सुरू केला. त्यासाठी सासवडमध्ये त्यांनी सभाही घेतली. त्यानंतर त्यांनी दादांना, आज कोंडे यांना पक्षात आणत मोठा दिलासा दिला आहे. भोर विधानसभा मतदारसंघात कोंडे यांनी दोनदा निवडणूक लढली आहे. त्यावेळी त्यांना लक्षणीय मते मिळाली होती.
अजितदादा भाषणादरम्यान बोलताना म्हणाले, चांगल्यापध्दतीने आता आपली युती झाली आहे. तिला कुठेही दृष्ट लागेल असे काम करायचे नाही. पुरंदर आणि हवेली मतदारसंघात विजय शिवतारेंमुळे ताकद वाढली आहे. तर कुलदीप कोंडेंमुळे भोर-वेल्हामध्ये आपली ताकद वाढली आहे. महायुतीकडून त्यांनाही तसाच मानसन्मान मिळेल, असा शब्द मी कोंडेंना देतो.
