मुंबई प्रतिनिधी :
दि. १६ मे २०२४
इन्स्टाग्राम रील्सची भुरळ अलीकडच्या काळात प्रत्येकाला पडताना दिसत आहे. विविध बॉलीवूड गाणी या रील्सवर नेहमीच व्हायरल होत असतात. सामान्य लोक असो की सेलिब्रिटी, सगळेच या व्हायरल गाण्यांवर थिरकत असतात. संजू राठोडच्या ‘गुलाबी साडी’नंतर आता आणखी एक गाणं सर्वत्र ट्रेडिंग होत असल्याचं पाहायला मिळत आहे. मराठी कलाविश्वातील लोकप्रिय नारकर जोडप्याने या गाण्यावर नुकताच डान्स केला आहे.
सोशल मीडियावर ऐश्वर्या आणि अविनाश नारकर यांची जोडी कायम चर्चेत असते. नारकर जोडप्याच्या रील्स व्हिडीओची सर्वाधिक चर्चा इन्स्टाग्रामवर रंगते. हे दोघेही ट्रेडिंग असणाऱ्या लोकप्रिय गाण्यांवर भन्नाट रील्स बनवतात. नारकरांनी शेअर केलेला असाच एक व्हिडीओ सध्या सर्वांचं लक्ष वेधून घेत आहे.
बॉलीवूडमध्ये १७ वर्षांपूर्वी ‘झुम बराबर झुम’ हा चित्रपट प्रदर्शित झाला. अभिषेक बच्चन, प्रिती झिंटा, लारा दत्ता आणि बॉबी देओल यांच्या यामध्ये महत्त्वाच्या भूमिका होत्या. याच चित्रपटाचं मुख्य शीर्षक गीत असलेल्या ‘झुम बराबर झुम’ गाण्यावर आता नारकर जोडप्याने डान्स केला आहे. या व्हिडीओला ऐश्वर्या यांनी ‘प्रत्येक क्षणाचा आनंद घेत नेहमी मनापासून डान्स करा’ असं कॅप्शन दिलं आहे.
ऐश्वर्या आणि अविनाश नारकरांच्या डान्स व्हिडीओवर नेटकऱ्यांनी कमेंट्सचा पाऊस पाडला आहे. “अरे मलाही तुमच्याबरोबर डान्स करायचा आहे”, “अविनाश सरांची एनर्जी खरंच जबरदस्त आहे”, “अविनाश सरांना पाहून कोणालाही डान्स करावासा वाटेल”, “किती एन्जॉय करता”, “तुम्ही दोघे खूपच सुंदर नाचता” ऐश्वर्या नारकर यांनी शेअर केलेल्या व्हिडीओवर अश्या असंख्य प्रतिक्रिया आल्या आहेत.
सध्या ऐश्वर्या नारकर झी मराठी’ वाहिनीवरील सातव्या मुलीची सातवी मुलगी या मालिकेत ‘रुपाली’ हे नकारात्मक पात्र साकारत आहेत तर अविनाश नारकरांच्या ‘कन्यादान’ मालिकेने नुकताच प्रेक्षकांचा निरोप घेतला. या मालिकेत अविनाश यांच्यासह अनिषा सबनीस, संग्राम साळवी, अमृता बने, स्मितल हळदणकर, चेतन गुरव, शुभंकर एकबोटे यांनी महत्त्वाच्या भूमिका साकारल्या होत्या.
