पुणे प्रतिनिधी :
दि. २३ डिसेंबर २०२४
महायुती सरकारच्या खातेवाटपानंतर आता पालकमंत्रिपदांवरून रस्सीखेच सुरू झाली आहे. पुण्याचे पालकमंत्रिपद अजित पवार की चंद्रकांत पाटील यांच्यापैकी कोणाला मिळणार, याकडे सर्वांचे लक्ष लागले आहे. बीडमध्ये मुंडे भाऊ-बहिणींपैकी कोणाला संधी मिळणार, हे पाहणेही उत्सुकतेचे ठरणार आहे. केंद्रीय मंत्री मोहोळ यांनी सावधपणे यावर आपली प्रतिक्रिया दिली आहे.
महायुती सरकारचे खातेवाटप शनिवारी झाले असून आता पालकमंत्रिपदांसाठी रस्सीखेच होताना दिसत आहे. एकनाथ शिंदे यांच्या शिवसेनेतील मंत्री संजय शिरसाट आणि भरत गोगावले यांनी पालकमंत्रिपदावर दावा केलाय. शपथविधी झाल्यावर आठवडाभराने खातेवाटप झालं. आता पालकमंत्री कधी जाहीर होणार याकडे सर्वांचं लक्ष लागलं आहे. महाराष्ट्रातील मुख्य जिल्ह्यांपैकी एक असलेल्या पुणे जिल्ह्याचे पालकमंत्रिपद कोणत्या दादांकडे असणार? अजित पवार की चंद्रकांत पाटील यांच्यामध्ये चुरस पाहायला मिळणार आहे. अशातच यावर केंद्रीय मंत्री मुरलीधर मोहोळ यांनी आपली प्रतिक्रिया दिली आहे.
आमच्याकडे या स्तरावरती काही ठरत नाही. आमचे नेते त्याच्यावर निर्णय घेत असतात, पालकमंत्रिबाबत महायुतीचे सगळे नेते बसून फक्त पुण्याचे नाहीतर महाराष्ट्राच्या जिल्ह्याचे निर्णय होतील. तुम्ही कशीही गुगली टाकली तरी मी सावध आहे. यॉर्कर टाका, गुगली टाका मी पण आता चांगला बॅट्समन होत चाललो आहे. खातेवाटप एकमताने झाले, आता ज्या त्या जिल्ह्याचे पालकमंत्री ठरवताना एकमताने होतील. याबाबत कोणतीही शंका माझ्या मनात नाही, तुम्हीसुद्धा ठेवू नका, असं मुरलीधर मोहोळ म्हणाले.
बारामती मतदारसंघातून अजित पवार मोठ्या मताधिक्याने विजयी झाले होते. तर चंद्रकांत पाटील कोथरूड मतदारसंघामधून विजयी झाले. कोथरूडमध्ये तिरंगी लढत झाली होती, त्यामध्ये चंद्रकांत दादांनी विजय मिळवला होता. खातेवाटपामध्ये अजित पवार यांच्याकडे अर्थ खातं देण्यात आलं आहे. तर चंद्रकांत पाटील यांच्याकडे उच्च व तंत्रशिक्षण खाते कायम ठेवण्यात आलंय.
दरम्यान, अजित पवार भाजपसोबत गेले होते त्यावेळी उपमुख्यमंत्रिपदासह त्यांच्याकडे पुण्याचे पालकमंत्रिपदही देण्यात आले होते. यंदा पालकमंत्रिपदाची माळ कोणाच्या गळ्यात पडते हे पाहणं महत्त्वाचं ठरणार आहे. पुण्यासह रायगड, ठाणे, बीड आणि संभाजीनगर या जिल्ह्यांचे पालकमंत्रिपद कोणाकडे जाणार हे पाहावं लागणार आहे. बीडमध्ये मुंडे बहिण-भावांमध्ये कोणाला पालकमंत्रिपद मिळणार? बीड जिल्ह्यामध्ये दोन मंत्री असल्याने पंकजा मुंडे की धनंजय मुंडे कोणाच्या पारड्यात पालकमंत्रिपद जाणार हे पाहणं औत्सुक्याचं ठरणार आहे.
