पुणे प्रतिनिधी :
दि. २३ डिसेंबर २०२४
लोकसभा निवडणुकीत जोरदार यश संपादन केल्यानंतर विधानसभा निवडणुकीत देखील अशाच कामगिरीची महाविकास आघाडीला अपेक्षा होती. मात्र विधानसभा निवडणुकीत महाविकास आघाडीचा दारुण पराभव झाला या पराभवातून बाहेर येत आता महाविकास आघाडीतील पक्षांनी पक्ष संघटना बांधणीवर भर देत येत्या स्थानिक स्वराज्य संस्था निवडणुकीला सामोरे जाण्याचा चंग बांधला आहे. यासाठीच शिवसेनेचे ( उद्धव बाळासाहेब ठाकरे ) नेते आणि खासदार संजय राऊत यांनी पुण्यामध्ये कार्यकर्त्यांची एक बैठक घेतली. मात्र या बैठकीला माजी नगरसेवकांनी मारलेली दांडी हा चर्चेचा विषय ठरला आहे.
संजय राऊत यांनी मुंबईत महानगरपालिकेची निवडणूक स्वबळावर लढण्याचा निर्णय स्वतःच केल्यानंतर पुण्यात मात्र कार्यकर्त्यांचा विचार घेऊनच निर्णय घेऊ असं स्पष्ट केलं होतं आणि त्यानंतर पक्ष संघटना मजबूत करण्यासाठी पुणे आणि पिंपरी चिंचवडच्या कार्यकर्त्यांची बैठक घेतली होती. मात्र, विधानसभा निवडणुकीत झालेल्या दारुण पराभवानंतर ठाकरे सेनेचे शिलेदार पालिका निवडणुकी बाबत काहीसे संभ्रमात असल्याचं बोललं जात आहे. त्यामुळे आगामी महापालिका निवडणुकीच्या पूर्वी शिवसेना ठाकरे गटाला धक्के बसण्याची शक्यता आहे. कारण संजय राऊत यांनी घेतलेल्या बैठकीमध्ये ठाकरे गटाचे सर्वचे सर्व माजी नगरसेवक हे अनुपस्थित राहिल्याने ही चर्चा आता सुरू झाली आहे.
गेल्या महापालिका निवडणुकीत एकत्रित शिवसेनेने पुण्यात दहा ठिकाणी विजय मिळवला होता. त्यानंतर शिवसेनेच्या फुटीचा सर्वात कमी फटका हा पुणे शहरात बसला होता. कारण एकनाथ शिंदे यांच्यासोबत त्यावेळेस फक्त एकच नगरसेवक गेला होता. तर, लोकसभा निवडणुकी वेळी शिवसेनेचे माजी नगरसेवक असलेल्या अविनाश साळवे यांनी काँग्रेसमध्ये प्रवेश केला. त्यामुळे सद्य परिस्थितीला आठ माजी नगरसेवक हे शिवसेना उद्धव ठाकरे पक्षा सोबत आहेत. हे आठही माजी नगरसेवक संजय राऊत यांच्या बैठकीला उपस्थित नव्हते. त्यामुळे शिवसेना फुटल्यानंतर जे धक्के उद्धव ठाकरे यांना पुण्यात बसले नव्हते ते महापालिका निवडणुकीच्या तोंडावर बसणार का याची चर्चा आता सुरू झाली आहे.
दरम्यान दुसरीकडे, या बैठकीबाबत निरोप आदल्या दिवशी सायंकाळी अचानक मिळाल्याने आणि बैठकीच्या दिवशीचा प्रोग्रॅम आधीच फिक्स झाल्याने बैठकीला उपस्थित राहू शकलो नाही असं काही नगरसेवकांनी सांगितल आहे.
