मुंबई प्रतिनिधी :
दि. १३ जानेवारी २०२५
आज काँग्रेसला सामनाच्या अग्रलेखात चांगलंच सुनावण्यात आलं आहे. काँग्रेसच्या संस्कृतीला , दिल्ली निवडणुकीसाठी केजरीवाल यांना देशद्रोही ठरवून प्रचाराचा मुद्दा करणे शोभत नाही, असं यात म्हटलं गेलं. त्यानंतर आता शिवसेना उद्धव ठाकरे गटाचे नेते संजय राऊत यांनी याबाबत बोलताना म्हटलं की, तुम्ही असं का म्हणताय की सामनाच्या संपादकीयमध्ये काँग्रेसवर सडकून टीका केली आहे? तसं नसून त्यामध्ये इंडिया आघाडीचं मन मोकळं केलं आहे. इंडिया आघाडीविषयी असलेल्या आमच्या घटकपक्षातील नेत्यांच्या भावना त्यात व्यक्त केल्या आहेत.
“इंडिया आघाडी अधिक मजबूत व्हावी, टिकावी आणि देशाच्या राजकारणात अधिक पुढे जावी, ही आमच्या सर्वांची इच्छा आहे, पण गेल्या काही दिवसांपासून आमचे काही घटकपक्ष या भूमिकेत आहेत की त्यामुळे संवाद तुटला आहे. संवाद तुटला तर कुठलीच आघाडी यशस्वी होत नाही. शिवसेना भाजप युतीमध्ये संवाद तुटला म्हणून युती तुटली. २०१९ मध्ये योग्य संवाद झाला नाही म्हणून युती तुटली”, असं संजय राऊत म्हणाले.
ते पुढे म्हणाले, “इंडिया आघाडीमध्ये ३० पक्षांशी संवाद ठेवण्यासाठी काही जबाबदार नेत्यांची नियुक्ती झाली पाहिजे हे उद्धव ठाकरेंनी इंडिया आघाडीच्या बैठकीत अनेकदा सांगितलं आहे. ओमर अब्दुल्ला म्हणाले होते की, ही आघाडी लोकसभा निवडणुकीसाठी तयार झाली. लोकसभेत या आघाडीने चमकदार कामगिरी केली, लोकसभेत नरेंद्र मोदी यांचं बहुमत संपवून टाकलं. त्यामुळे ही आघाडी टिकली पाहिजे. संसदेच्या बाहेरही आम्ही काम केलं पाहिजे”.
“ज्याप्रकारे हुकुमशाही पुन्हा एकदा डोकं वर काढत आहे, ही बाब चिंताजनक आहे. आमच्या आघाडीतील मोठा पक्ष म्हणून ही जबाबदारी सर्वात जास्त काँग्रेस नेतृत्त्वाची आहे. ही त्यांनीच घ्यायला पाहिजे”.
“एकमेकांविरोधात निवडणुका लढणे काही चुकीचं नाही, पण असं करताना आपण आपल्या एकेकाळच्या सहकाऱ्यांना, भविष्यात लोकसभेला एकत्र येणार आहोत असं चित्र असेल तर त्यांना अगदी देशद्रोही ठरवण्यापर्यंत कोणीही जाऊ नये, अशी उद्धव ठाकरेंची भूमिका आहे”.
अमित शाहांच्या वक्तव्यावर प्रतिक्रिया देताना संजय राऊत म्हणाले की, “शरद पवार आणि उद्धव ठाकरे भाजपची रोजीरोटी आहे. दगाफटका कोणी केला, गद्दारांना सोबत घेऊन सरकार बनवलं आणि कोण दगाफटक्याच्या गोष्टी करत आहेत. या देशात जर कोणी दगाफटका, बेईमानीला खतपाणी घातलं असेल तर ते भाजपने आणि खासकरुन नरेंद्र मोदी आणि अमित शाहांनी घातलं”.
