नागपूर प्रतिनिधी :
दि. १३ फेब्रुवारी २०२५
नागपुरातील एका शाळेजवळीत स्टेशनरीच्या दुकानात दुकानाचे शटर दुरुस्त करण्यासाठी आलेल्या नराधमाने दोन तासात १७ विद्यार्थिनींचा विनयभंग केल्याची संतापजनक घटना घडली आहे. याप्रकरणी पोलिसांनी आरोपीला अटक केली आहे.
नागपूरच्या नंदनवन पोलीस ठाण्यांतर्गत एका विकृत मानसिकतेच्या व्यक्तीने एका खासगी शाळेतील सुमारे १७ अल्पवयीन विद्यार्थिनींचा विनयभंग केल्याची धक्कादायक माहिती समोर आली आहे. मात्र, याप्रकरणी तक्रार आल्यानंतर पोलिसांनी आरोपीला अटक करून पुढील तपास सुरू केला आहे. हा प्रकार उघडकीस आल्यानंतर पालकांमध्येही भीतीचे वातावरण निर्माण झाले आहे.
नंदनवन पोलीस ठाण्याच्या परिसरात ही खाजगी नामांकित शाळा आहे. शाळेजवळ स्टेशनरीचे दुकान आहे. बुधवारी दुपारी एक चिमुरडी शाळकरी मुलगी स्टेशनरी दुकानात सामान घेण्यासाठी गेली असता हा प्रकार घडला. ३६ वर्षीय रवी लाखे असे आरोपीचे नाव आहे. आरोपी रवी हा शटर दुरुस्ती करण्याचे काम करतो. स्टेशनरी दुकानात लावलेले शटर खराब झाल्याने रवी दुकानात आला होता, असे सांगितले जात आहे.
अवघ्या २ तासात आरोपी रवी याने एक-दोन नव्हे तर स्टेशनरी दुकानात सामान घेण्यासाठी आलेल्या सुमारे १७ चिमुकल्या मुलींशी अश्लील कृत्य करून विनयभंग केला. मात्र, भीती आणि अज्ञानामुळे आरोपीचे हे घृणास्पद कृत्य त्या चिमुरड्यांना समजू शकले नाही, त्यामुळे त्यांनी प्रतिकार देखील केला नाही. शाळा सुटल्यानंतर काही मुलींनी घरी जाऊन घरच्यांना घडलेला प्रकार सांगितला. यानंतर संतप्त कुटुंबीयांनी प्रथम शाळा गाठली आणि शाळा प्रशासनाला या घटनेची माहिती दिल्यानंतर त्यांनी नंदनवन पोलीस ठाण्यात जाऊन तक्रार दाखल केली. मात्र, सुरुवातीला कुटुंबातील काही सदस्यच तक्रार देण्यासाठी पोलीस ठाण्यात पोहोचले. आरोपी रवी विरुद्ध पोलीस ठाण्यात विनयभंगाचा गुन्हा दाखल झाल्याची माहिती मिळताच इतर लहान मुलांनीही हा प्रकार आपल्या कुटुंबीयांना सांगितला.
आत्तापर्यंत आरोपीने १७ लहान मुलींसोबत हा जघन्य गुन्हा केला होता. मात्र, या घटनेची माहिती मिळताच पोलिसांनी आरोपीला अटक करून पुढील तपास सुरू केला आहे. या घटनेनंतर शाळा व्यवस्थापनाच्या कार्यपद्धतीवर प्रश्न उपस्थित होऊ लागले असून शाळेत शिकणाऱ्या विद्यार्थीनींच्या पालकांच्या मनात भीतीचे वातावरण निर्माण झाले आहे.
