पुणे प्रतिनिधी :
दि. २४ फेब्रुवारी २०२५
दिल्लीत ९८ वे अखिल भारतीय मराठी साहित्य संमेलन सुरु आहे. या संमेलनात ‘असे घडलो आम्ही’ या कार्यक्रमा दरम्यान ठाकरेंच्या शिवसेनेत दोन मर्सिडीज दिल्या की, एक पद मिळायचं, असं वादग्रस्त विधान शिवसेना शिंदे गटाच्या नेत्या उपसभापती डॉ. नीलम गोऱ्हे यांनी काल केलं. नीलम गोऱ्हे यांच्या या विधानानंतर ठाकरे गटाचे शिवसैनिक आक्रमक झाल्याचं पाहण्यास मिळालं.
त्या पार्श्वभूमीवर पुण्यातील शिवाजीनगर भागातील मॉडेल कॉलनी येथील उपसभापती नीलम गोऱ्हे यांच्या निवासस्थाना बाहेर काल ठाकरे गटाकडून आंदोलन करण्यात आले आणि नीलम गोऱ्हे यांनी नाक घासून उद्धव ठाकरे यांची माफी मागावी, अशी मागणी आंदोलनकर्त्यांनी यावेळी केली.नीलम गोऱ्हे चार वेळा आमदार झाल्या आणि जाताना ताटात घाण करून गेल्या. या बाईचं विधान परिषदेचं कर्तृत्व समजून घ्यायचं असेल तर पुण्याचे गटनेते अशोक हरणावळ होते त्यांची मुलाखत घ्या,मग मर्सिडिज प्रकरण कळेल,असा गौप्यस्फोट ठाकरे गटाचे नेते खासदार संजय राऊत यांनी आज झालेल्या पत्रकार परिषदेत केला.
त्या गौप्यस्फोटाबाबत पुणे महापालिकेतील ठाकरे गटाचे माजी गटनेते अशोक हरणावळ यांच्याशी संवाद साधला असता ते म्हणाले, “शिवसेना प्रमुख बाळासाहेब ठाकरे आणि उद्धव ठाकरे यांच्या माध्यमातून राज्यभरात लाखो शिवसैनिक घडले आहेत आणि स्वतःच्या पायावर उभे राहिले आहेत.यापैकी मी एक असून उद्धव ठाकरे यांनी मला नगरसेवक,गटनेता होण्याची संधी दिली.पण ज्यावेळी नीलम गोऱ्हे या पुणे जिल्ह्याच्या संपर्क नेत्या होत्या, त्यावेळी नीलम गोऱ्हे या महापालिकेच्या प्रत्येक कामकाजात हस्तक्षेप करीत असत. कोणाच्या विरोधात सभागृहात प्रश्न विचारायचा,कोणाला अडचणीमध्ये आणायाचे,त्यावेळी अर्थकारण कसे करण्यात आले, हे मला माहिती आहे. त्यामुळे आमचे श्रध्दास्थान उद्धव ठाकरे यांच्यावर नीलम गोऱ्हे यांनी आरोप करणे थांबवावे, अन्यथा नीलम ताई माझ्याकडे तुमची पूर्ण कुंडली असून लवकरच भांडाफोड केला जाईल, असा इशारा यावेळी त्यांनी दिला.
