पुणे प्रतिनिधी :
दि. १३ मार्च २०२५
येत्या २७ मार्च रोजी राज्यात विधानपरिषदेच्या पाच जागांसाठी निवडणूक होत आहे. या निवडणुकीसाठी १७ मार्च हा उमेदवारी अर्ज दाखल करण्याचा शेवटचा दिवस आहे. या पाच जागांपैकी भाजपला तीन, शिंदेंच्या शिवसेनेला एक, तर राष्ट्रवादीला एक अशा जागा मिळणार आहेत. यापैकी भाजपच्या तीन जागांचे उमेदवार फायनल झाल्याची माहिती आहे. तर राष्ट्रवादीमध्ये मात्र एका जागेसाठी इच्छुकांची मोठी भाऊगर्दी पाहायला मिळत आहे.
यातच आता पिंपरी – चिंचवड शहराचे राष्ट्रवादीचे नेते नाना काटे यांनी देखील या जागेवर दावा केला आहे. नाना काटे हे राष्ट्रवादी काँग्रेसचे चिंचवड या भागातील नेते आहेत. ते चिंचवड विधानसभा मतदारसंघात निवडणूक लढवण्यासाठी इच्छुक होते. तशी तयारी देखील त्यांनी केली होती. मात्र महायुतीमध्ये ही जागा भाजपच्या वाटायला गेल्याने ऐन वेळेस नाना काटे यांना माघार घ्यावी लागली होती. त्यामुळे आता विधानसभा निवडणुकीच्या वेळी मला माघार घ्यायला लावली होती त्या बदल्यात आता न्याय करण्याची वेळ आली असून विधानपरिषदे संदर्भात आम्ही अजित पवारांना भेटणार असल्याचं नाना काटे म्हणाले आहेत. तर, महायुतीमध्ये चिंचवडची जागा ही भाजपला जात आहे त्यामुळे तुम्ही आता माघार घ्या, पुढे जे काही असेल ते आपण पाहू असं अजित पवार यांनी मला विधानसभा निवडणुकीच्या वेळी सांगितलं होतं. आता विधानपरिषदेसाठी निवडणूक होत आहे त्यामुळे हाच तो क्षण आहे. असं नाना काटे म्हणाले आहेत.
पिंपरी-चिंचवड शहरामध्ये भारतीय जनता पक्षाचे विधानसभेवर दोन आमदार आहेत तर विधानपरिषदेवर दोन आमदार आहेत. त्यामुळे शहरात भाजपचे चार आणि राष्ट्रवादीचा फक्त एक आमदार आहे. शहरात पक्षाची परिस्थिती पाहता राष्ट्रवादी काँग्रेसला अजून एक आमदार आवश्यक आहे. त्यामुळे माझ्यासाठी शहरातील सर्व नगरसेवकांनी सह्यांची मोहीम राबवली आहे. आम्ही लेटर देखील तयार केलं आहे. परंतु आत्ता अधिवेशन सुरू असल्याने अजित दादांची भेट होत नाही. पण दादांना आम्ही निरोप दिला आहे. आम्ही सर्वजण सह्यांचे निवेदन घेऊन दादांना भेटणार आहोत. असं देखील नाना काटे म्हणाले आहेत.
दुसरीकडे, विधानसभा निवडणुकीत माघार घेण्याच्यावेळी देवेंद्र फडणवीस यांनी मला फोन केला होता आणि विनंती केली होती की नानाभाऊ यावेळेस आमच्यासाठी माघार घ्या. भविष्यात आम्ही नक्कीच तुमच्या कामी येऊ. म्हणजेच तो दिवस, तो क्षण आत्ता आहे. त्यामुळे हे लोक पण मला मदत करतील अशी मला अपेक्षा आहे. विधानसभा निवडणुकीत मी महायुतीचा धर्म पाळून काम केलं आहे. आता या काळात त्यांनी महायुतीचा धर्म कसा पाळायचा हे त्यांनी ठरवायचं आहे. असं म्हणत नाना काटे यांनी राष्ट्रवादी सह भाजपमधून सुद्धा विधानपरिषदेच्या जागेसाठी फिल्डिंग लावली आहे. त्यामुळे राष्ट्रवादीमध्ये एका जागेसाठी शंभरहून अधिक अर्ज आले आहेत. त्यात नाना काटेंची देखील भर पडली आहे. आता या मधून अजित पवार नक्की कोणाला संधी देतात हे लवकरच स्पष्ट होईल.
