छत्रपती संभाजीनगर प्रतिनिधी :
दि. २१ मार्च २०२५
खुलताबाद येथील औरंगजेबाच्या कबर परिसरात ‘एसआरपीएफ’चे ११५ शस्त्रधारी जवान, दंगल नियंत्रण पथकातील २५ पोलिस जवान, ६० पोलिस अंमलदार, महिला पोलिस, भारतीय पुरातत्त्व विभागाचे खासगी सुरक्षारक्षक असा मोठा फौजफाटा तैनात करण्यात आला आहे. बजरंग दल हे औरंगजेबाच्या कबरीवर आक्रमक झाल्याचे बघायला मिळतंय. हेच नाही तर मोठा इशारा देखील देण्यात आलाय. आता यावर बोलताना छत्रपती संभाजीनगरचे जिल्हाधिकारी दिलीप स्वामी म्हणाले की, मागील काही दिवसांपासून काही चर्चा कानावर येत आहेत, त्यामुळे पोलीस बंदोबस्त आम्ही त्याठिकाणी मोठ्या प्रमाणात वाढवलेला आहे. विविध प्रतिबंधात्मक आदेश आम्ही जिल्हाभरामध्ये लागू केलेले आहेत, शहरात देखील संवेदनशील ठिकाणी पोलीस बंदोबस्त लावला आहे. काहींनी या ठिकाणी जाऊन निदर्शने आंदोलन करण्यासंदर्भात निवेदन दिले होते. त्याच दृष्टिकोनातून देखील आम्ही पावले उचलली आहेत.
पोलीस आयुक्त, पोलीस अधीक्षक व तालुका स्तरावरील सर्व अधिकारी कर्मचारी या विषयावर बारकाईने लक्ष ठेवून आहेत. विविध ठिकाणी प्रतिबंधात्मक आदेश काढण्यासंदर्भात देखील सूचना दिल्या असल्याचे स्वामी यांनी म्हटले आहे. पुढे बोलताना दिलीप स्वामी म्हणाले की, कायदा व सुव्यवस्था यासाठी प्रशासन पूर्णपणे प्रयत्न करत आहे. खुलताबाद येथे कोणताही अनुसूचित प्रकार घडू नये, याकरिता प्रशासनाकडून अगोदरच पाऊले उचलली जात आहेत.
पुढे जिल्हाधिकारी म्हणाले की, बाहेरच्या जिल्ह्यातील काही मंडळी होती. काल आम्ही मिस्टर एकबोटे म्हणून कोणीतरी होते त्यांना आदेश दिले आहेत. त्या अगोदर सांगलीतून काही मंडळी येण्यासंदर्भात बातम्या आल्या होत्या. त्यामुळे त्यांना पण आम्ही प्रतिबंधात्मक आदेश लागू केले आहेत. औरंगजेबाच्या कबरीबद्दल बोलताना मिलिंद एकबोटे हे दिसले होते. जिल्हा प्रशासनाकडून औरंगजेबाच्या कबरीबद्दल सावध भूमिका अगोदरच घेतली जातेय.
