मुंबई प्रतिनिधी :
दि. १६ एप्रिल
ईस्टर्न फ्रीवेवर शिवडीजवळ सोमवारी एका मारुती इको कारने दुभाजकाला धडक दिल्याने झालेल्या अपघातात दोघांचा मृत्यू झाला तर चार जण जखमी झाले. रामजी जयस्वार (६०) आणि विनोद रामा वैद्य (५२) अशी मृतांची नावे असून जखमींमध्ये गीता राजभर, खुशबू राजभर, सुलेखा वैद्य आणि चेतन नंदू पाटील यांचा समावेश आहे.
पोलिसांनी दिलेल्या माहितीनुसार चेतन पाटील हा इको कार चालवत होता. सहा जणांना घेऊन ते सारे ठाण्याहून मुंबईच्या दिशेने मासे खरेदीसाठी येत होते. कारमधील सर्व प्रवासी दक्षिण मुंबईतील बाजारात मासे खरेदी करून त्यांची ठाण्यात विक्री करतात.
सोमवारी सकाळी नेहमीप्रमाणे तो निघाला. ईस्टर्न फ्रीवेवर त्याने कारचा वेग वाढवला. प्रवासी गाडीचा वेग कमी करण्याची विनंती करत होते मात्र तो ऐकला नाही. भरधाव वेगात असल्याने त्यांचे कारवरील नियंत्रण सुटले आणि कार दुभाजकावर आदळून पलटी झाली.
या अपघाताची माहीती मिळताच पोलिसांनी घटनास्थळी धाव घेतली. जखमी झालेल्या रामजी, विनोद, गीता, खुशबू, सुलेखा आणि चेतन यांना रुग्णालयात नेण्यात आले. गंभीर दुखापत झाल्याने रामजी आणि विनोद यांना डॉक्टरांनी मृत घोषित केले तर इतर चौघांवर उपचार सुरू असल्याचे पोलिसांनी सांगितले.
