मुंबई प्रतिनिधी :
दि. ०९ मे २०२५
रवीना टंडन ही सुप्रसिद्ध बॉलिवूड अभिनेत्री असून ९०च्या दशकात तिनं बॉलिवूडवर राज्य केलंय. इतकंच नव्हे तर ९०च्या दशकातील सर्वाधिक कमाई करणाऱ्या अभिनेत्रींपैकी ती एक होती. पण रवीनाबद्दल एक मनोरंजक गोष्ट तुम्हाला माहितीये का? ही कथा पाकिस्तानचे माजी पंतप्रधान नवाज शरीफ, कारगिल युद्ध आणि बॉम्बशी संबंधित आहे.
पाकिस्तानचे माजी पंतप्रधान नवाज शरीफ यांनी एकदा एका मुलाखतीत खुलासा केला होता की, रवीना टंडन ही त्यांची आवडती अभिनेत्री आहे. त्यांच्या या वक्तव्यानंतर काही वर्षांनी १९९१ मध्ये कारगिल युद्ध झालं. या काळात भारतीय सैनिकांनी काही बॉम्बवर ‘फॉर नवाज शरीफ फ्रॉम रवीना टंडन’ असं लिहिलं. त्यासोबत त्यावर एक हार्टसुद्धा बनवण्यात आलेलं. हे बॉम्ब युद्धात पाकिस्तानविरुद्ध वापरायचे होते. जेव्हा या बॉम्बचे फोटो वर्तमानपत्रात आले तेव्हा जनतेनं भारतीय सैनिकांच्या या कृतीचं खूप कौतुक केलं.
या घटनेनंतर काही वर्षांनी, रवीना टंडनने हिंदुस्तान टाईम्सला दिलेल्या मुलाखतीत याबद्दल भाष्य केलं होतं. अभिनेत्रीने बॉम्बवर तिचं नाव लिहिल्याबद्दल प्रतिक्रिया दिली होती. ते फोटो रवीनाने नंतर पाहिल्याचं तिनं सांगितलं. अभिनेत्रीने सांगितलं होतं की, युद्धाऐवजी वाटाघाटीचा पर्याय निवडण्याचा सल्ला ती देईल. त्याचबरोबर रवीना असंही म्हणाली की, जर तिला तिच्या देशाचं रक्षण करण्यासाठी सीमेवर उभं राहावं लागलं तर ती मनापासून आणि धैर्याने सगळं करेल.
त्याचबरोबर रवीनाने यूपी पोलिसांच्या “बियॉन्ड द बॅज” या पॉडकास्टमध्ये म्हटलं होतं की, ‘मला आयपीएस व्हायचं होतं. मी त्यावेळी किरण बेदींची फॅन होते. त्या खूप धाडसी व्यक्तिमत्वाच्या होत्या. आम्ही त्यांच्या गोष्टी ऐकायचो, म्हणून मी त्यांच्याकडून प्रेरणा घ्यायचे आणि म्हणायचे की पदवीनंतर मी आयपीएस होईन. पण आता चित्रपटांच्या आयुष्यात पोलिस अधिकाऱ्याची भूमिका साकारण्याची संधी मिळते.’
दरम्यान, रवीना टंडनच्या वर्क फ्रंटबद्दल सांगायचं झाल्यास तिनं ‘मोहरा’, ‘खिलाडियों का खिलाडी’, ‘जिद्दी’, ‘लाडला’, ‘दमन’, ‘बडे मियाँ छोटे मियाँ’, ‘दुल्हे राजा’, ‘शूल’ आणि ‘केजीएफ 2’ यांसह अनेक सुपरहिट सिनेमांमध्ये काम केलंय.
